Kərim Benzemanı artıq əminliklə ''Real''ın əfsanəsi adlandırmaq olar.

"Football-plus.az" xəbər verir ki, fransalı forvard şərab kimi yaşlandıqca daha da səviyyəsini artırır.

Dünən İspaniya kubokunun yarımfinalının cavab oyununda, ''Nou Kamp''da baş tutan ''El Klasiko''da həm ''Real'', həm də Benzema şou göstərdi. Madrid nəhəngi ilk oyunda evdəki minimal hesablı məğlubiyyətin qisasını səfərdə 4:0 hesablı tarixi qələbə ilə çıxdı.

21-ci əsrdə ilk dəfə prinsipial rəqibini 4 top fərqi ilə yenən ''Kral klubu'' 9 ildən sonra ilk dəfə bu turnirin finalına yüksəldi. ''Real''ın ''Barsa'' üzərində 3 top fərqindən daha böyük qələbəsi sonuncu dəfə 1995-in yanvarında (5:0), ''Nou Kamp''da isə 60 il öncə - 1963-ün yanvarında (5:1) qeydə alınıb.

Bilindiyi kimi müsəlman olan və dininə bağlı olan Benzema hər il Ramazan ayında oruc tutur. Ardıcıl 2-ci ildi ki, orucluq vaxtı o, mükəmməl məhsuldarlıq sərgiləyir. Ötən həftəsonu ''Valyadolid''lə oyunda 7 dəqiqəyə het-trik edən 35 yaşlı futbolçu ''Nou Kamp''da da 3 qol, 1 məhsuldar ötürməlik möhtəşəm performans sərgilədi. O, karyerası ərzində 43-cü ''El Klasiko''sunda vurduğu qolların sayını 16-ya yüksəldərək əfsanəvi Raul Qonsalesi geridə qoydu. Bu duelin tarixində yalnız Alfredo Di Stefano, Kriştiano Ronaldo (hərəyə 18) və Lionel Messi (26) ondan daha çox qol vurub. Qeyd edək ki, ''Barsa'' ilə oyunda het-trik edən ''Real''ın son futbolçusu 1995-də İvan Samorano (''Nou Kamp''da 1963-də Ferents Puşkaş) olmuşdu. Bu il orucluqda 2 oyuna 6 qol vuran ünlü futbolçu ötən il isə ''Çelsi'' ilə səfərdəki het-trik də daxil olmaqla 8 oyuna 10 top vurmuşdu.

Yəni Kərim son 2 ildə Ramazan ayında keçirdiyi 10 oyuna 16 qol vurub!