"Football-plus.az" xəbər verir ki, bu sözləri "Səbail"in baş məşqçisi Şahin Diniyev premyer-liqanın "Kəpəz"lə (1:0) səfər görüşündən sonra mətbuat konfransında deyib. O, jurnalistlərin suallarını cavablandırıb.

- Dünən "Sumqayıt" qələbə qazanmağı bacardı. Oyuna fiziki, taktiki, yoxsa psixoloji olaraq hazırlaşmışdız?

- Daha çox psixoloji hazırlığa fikir veririk. Futbolçular uduzmaqdan qorxur. Qorxursansa, bu başına gələcək. Ən böyük problemimiz psixologiya ilə bağlıdı.

- Mahmud Qurbanovun vaxtında da komanda qol epizodlarını dəyərləndirə bilmirdi. Bu gün də eyni problem davam edir...

- Futbolçularım haqda mənfi fikirlər səsləndirmək istəmirəm. Ustalıq səviyyəsi çatışmır. Bunu psoxologiyanın da üstünə atmaq olar. Amma 2 metrdən qol vura bilmiriksə, bunun psixoloji durumla əlaqəsi yoxdu. Birdən-birə nəyisə dəyişmək olmur. Səkkiz xal toplamışıq. Əvvəldən xalımız çox olsaydı, indi daha rahat idik. Reallıqla barışıb mübarizə aparacağıq. Şükürlər olsun ki, ölən yoxdu. Həyat davam edir. Hər şeyin altında faktlar dayanır. Fakt da odur ki, uduzmuşuq. Xəyallarla yaşasaq, çox şey qura bilərik. Həyat reallıqdı. Reallıqla barışmaq lazımdı.

- Daha əvvəl "Kəpəz"də işləmisiz. İllər sonra rəqib kimi gəldiniz. Hansı hisslər keçirdiz?

- Həmişə demişəm ki, Gəncə azarkeşləri savadlı, futbolu biləndi. Yaxşı qarşıladılar, sağolsunlar. Bu şəhərdə futbol oynamışam, məşqçilik etmişəm. "Səbail"lə matçdan sonra "Kəpəz"dən ayrılmışdım. Bir neçə ildən sonra məhz "Səbail"lə Gəncəyə gəldim. Bu da bir təsadüfdü.

- Meydançanın ot örtüyü ilə bağlı nə deyə bilərsiz?

- Burada oynamaq olmaz. Futbolçuların ayağı yerə batırdı, hərəkət etmək olmurdu. İkinci hissədə futbolçularım dayandılar. Çünki qaça bilmirdilər. Meydança çox pis vəziyyətdədi. Futbolçuları qorumaq üçün burada oynamaq olmaz.

- Əsas oyunçuları əvəzlədiniz. Onları zədədən qorumaq üçün etdiniz?

- Bu barədə düşünmədim. Artıq ilk hissədən sonra futbolçuların ayaqları getmirdi. Gözləmədiyimiz addımları atmalı idik. Ona görə də gəncləri meydana buraxdıq. Hücum potensialı olan futbolçuların gücü bitmişdi. Ona görə də əvəzlədim.

- Qustavo de Fransanın oyunu sizi qane etdi?

- Bəli bu gün razı qaldım. Daha etibarlı, inamlı oynadı. Bəzi futbolçularım oruc tutmuşdu. Buna görə də yorğunluq hiss olunurdu.