Son günlər onun PSJ-də qalmaq perspektivi ilə bağlı yayılan xəbərlər isə səngimir. Mövsümün sonunda klubu ilə müqaviləsinin müddəti bitəcək Lionelin gələcəyi hələ də qeyri-müəyyən qalır.

"Football-plus.az" xəbər verir ki, onun sabiq komandası “Barselona”ya qayıdacağı, ABŞ və ya Səudiyyə Ərəbistanı klublarından birinə gedə biləcəyi haqda xəbərlər yayılır.

“Sport” qəzetinin yazdığına görə, MLS klubları Messi ilə bağlı birgə qərar veriblər. Qərara əsasən, hücumçu bu liqada çıxış edən komandalardan birinə keçsə, digər klublar da onun maaşının ödənilməsində pay sahibi olacaqlar. Messinin MLS-də oynamasının liqaya müsbət təsir edəcəyi üçün klublar bu qərara gəliblər. Həqiqətən də, qeyri-adi təşəbbüsdü. Amma bu da var ki, bu halda klubların teleyayın və başqa gəlirlərində artım gözləyəcək. Yəni MLS Messiyə görə maliyyə planında irəli düşəcək.

İddiaya görə, dünya çempionu artıq Fransada top qovmaq istəmir. Lionel “Barselona”ya qayıtmaq üçün maaşının azaldılmasına hazırdı. Bunu İspaniya mənbələri iddia edir. Futbolçunun sabiq klubunun iqtisadi vəziyyətinə uyğun maaş almağa hazır olduğu və atası olan meneceri Xorxedən “Barselona” rəhbərliyi ilə təmas qurmasını istədiyi bildirilib. Dünya çempionunun son vaxtlar baş məşqçi Xavi Ernandeslə müntəzəm münasibətdə olduğu da qeyd edilib. Xatırladaq ki, Messi İspaniya klubunda 2004-21-ci illərdə oynayıb.