“Gənclər və idman naziri cənab Fərid Qayıbov tərəfindən bu vəzifəyə layiq görüldüm. Belə məsuliyyətli işin mənə həvalə edilməsi böyük fəxr və şərəfdi. Fürsətdən istifadə edib bir daha cənab nazirə minnətdarlığımı bildirirəm. Ətrafımda olan, mənə inanıb-güvənən hər kəsin dəstəyini hiss etdiyimə görə çox xoşbəxtəm. Hamıya təşəkkür edirəm. Bu böyük etimadı doğrultmaq üçün əlimdən gələni edəcəm. Ağcabədi Olimpiya İdman Kompleksinin digər məkanlarla müqayisədə daha keyfiyyətli xüsusiyyətləri ilə fərqlənməsi üçün bütün qüvvəmi sərf edəcəm. Paralel şəkildə başqa işlərimlə də məşğul olacam. Çalışdığım sahələrin ictimai yönümlü olması yeni vəzifəmin perspektivini artırır və sürətli irəliləyiş üçün imkanlar yaradır. Nəticədə həmin kompleksdə digər idman növlərinin də inkişafı üçün əlverişli şərait yaratmaq asanlaşır. Bu imkanlardan tam yararlanmaq niyyətindəyəm. Hədəflədiyim səviyyəyə çatandan sonra regionlarda da layihələr həyata keçirmək istəyirəm. Gərgin əmək nəticəsində bütün arzularımın reallaşacağına inanıram. Allah utandırmasın”.