"Hazırda onların ən zəif yerləri yarımmüdafiə xəttidi" - AÇIQLAMA
Bu gün milli AÇ-2024-ün seçmə mərhələsində ilk oyununa çıxacaq.
Rəqib Avropanın top yığmalarından sayılmasa da, sayılıb-seçilən, heyətində aparıcı klubların şərəfini qoruyan futbolçuların yer aldığı Avstriya yığmasıdı. Görəsən, Canni de Byazinin çalışdırdığı komanda Lins şəhərində baş tutacaq oyununda necə təsir bağışlayacaq, səfərdən xalla dönmək mümkündü?
Avropa futbolunu yaxından izləyən həmkarımız Mirbağırağa Cəfəri “Football-plus.az”a açıqlamasında axşam keçiriləcək matçla bağlı fikirlərini bölüşdü, yığmanın şansını dəyərləndirdi: “Bəlkə də, millimizə bu qədər inamlı olduğum tsikl olmayıb. Əslində, mənə bu inamı verən son beş oyundakı qələbə deyil. Sadəcə heyətimiz yaxşıdı, gənc futbolçuların sayı çoxdu, avrokubok təcrübələri var. Həm də, elə son qələbələr hər halda futbolçulara inam verməlidi. Üstəlik Canni De Byazi artıq uzun müddətdi millidədi, tanıyır, kimin nəyə qadir olduğuna bələddi. Avstriya millisi zəif komanda deyil. Ancaq çox qorxulu komanda da deyil. Doğrudu, ulduzları var. Amma yaxşı durumda deyillər. Marko Arnautoviç böyük ehtimal oynamayacaq, Alaba da həmçinin. Digər ulduzları Sabitzer də zədəlidi, oynasa belə, pik səviyyədə olmayacaq. Qalan işlək oyunçular ortabab klublardandı. Mən Avstriya ilə matçda millimizdən daha yaxşı nəticə gözləyirəm, nəinki İsveçlə oyunda. Çünki Avstriya millisi millimiz üçün qorxulu rəqib olmamalıdı. Bütün tsikllərdə “ən azından sonuncu olmayaq” məntiqi ilə oyunlara çıxırdıq. Ümid edək ki, bu dəfə fərqli olacaq. Hər halda, meydandakı oyunumuzdan hər şeyi görəcəyik. Nə istədiyimizi görəcəyik. Avropa futbolundan çox uzaqda qalsaq da, hər halda klublarımızın göstərdiyi nəticələrə əsaslanıb demək olar ki, oralardan uzaq qalsan belə, nəsə etmək mümkündü. Avstriya millisinin müdafiə xətti daha güclüdü. Danso "Lans"da çıxış edir, hansı ki, onun komandası sezonun ən yaxşılarındandı. Trauner də "Feyenoord"un əsas üzvlərindəndi, bu klub da Niderlandda sezonun ən güclüsüdü. Müdafiə xəttinin güclü olduğunu görmək mümkündü. Fikrimcə, hazırda onların ən zəif yerləri yarımmüdafiə xəttidi. Marko Arnautoviçin olmayacağını nəzərə alsaq, yəqin ki, onu Onisivo əvəzləyəcək. Hansı ki, o da zədədən yeni qayıdıb, yaxşı durumda deyil. Əslində, avstriyalıların aparıcı üzvləri yaxşı vəziyyətdə deyillər. Bundan istifadə etmək olar. Üç günə Avstriya və İsveçlə görüşlərdən üzüağ çıxmaq millimiz üçün nə dərəcədə realdı, bilmirəm. Amma ümid edək ki, belə də olacaq. Təbii ki, millimiz bu iki ağır səfərdən üzüağ çıxsa, artıq qrupda da müəyyən yerlər üçün iddia etmək olar”.
RƏŞAD
Digər xəbərlər
