"Məndə bu xəstəlik anadangəlmə var. Uşaqlıqdan serebral iflic diaqnozu qoyulub. 5-6 yaşıma qədər çətinliklə də olsa nəyəsə tutunaraq gəzə, addım ata bilirdim. Sonradan bunu da itirdim, oturaq həyat tərzi keçirməyə başladım. 10-12 yaşımdan isə məndə onurğa əyriliyi yaranmağa başladı. Bu da sırf oturaq həyat, hərəkətsizlik, müalicəsizlik nəticəsində verdi. Başlarda bu, məni narahat etmirdi, ağrılar olmurdu. Görünüş baxımından təbii ki, utanırdım, niyə belə olduğunu anlamırdım, uşaq idim. Son 2,5-3 ildə isə ağrılar dözülməz həddə çatıb, yatmağa belə çətinlik çəkirəm, nəfəs darlığı olur. Bir müddət əvvəl yaxın çevrə, dostlar qərarlaşıb mənim üçün bir yardım kampaniyasına start verdilər. Əslində, bunu mənə daha öncə də dəfələrlə təklif ediblər. Sadəcə, qəbul edə, özümə yaraşdıra bilmirdim ki, necə insanlardan özüm üçün yardım, pul istəyim? Tək problemi, xəstəliyi olan mən deyiləm ki... Ancaq ağrılarım, narahatlıqlarım məni buna məcbur etdi. Çünki getdikcə durumum daha da ağırlaşır. Ağrılardan xilas olmaq, rahat yata bilmək üçün, gələcəyimi düşünərək buna razılıq verdim.

Bəzi insanlar yazır, məndən soruşur ki, niyə "Qarabağ" sənə yardım etmir? Bu kampaniya başlayan ilk gündən klub tərəfindən dəstək hiss etmişəm, istər rəhbərlik, istər oyunçular, istərsə də digər əməkdaşlardan. Bu, həm maddi yardım olub, həm də mənəvi dəstək. Bundan əvvəl də nəyəsə ehtiyacım olduqda dəfələrlə hazır olduqlarını bildiriblər. Sağ olsunlar. Əslində, onlar bunu etməyə də bilərdilər, borcları, belə bir öhdəlikləri yoxdu. "Qarabağ"ın sağlamlıqla bağlı problemləri olan tək azarkeşi mən deyiləm ki. Durub nəsə istəməyə də mənəvi haqqım çatmır. Hər şeydən əlavə, onlar mənim ən böyük xəyalımı, arzumu gerçəkləşdiriblər. Oyunları stadiondan canlı izləmək imkanı qazandım, klubun bazasında oldum, sevimli komandamla, futbolçularla görüşmək, söhbətləşmək şansı əldə etdim. Bunlar xəyalım idi, onların sayəsində gerçək oldu. Onu da bildirim ki, edilən maddi yardımlardan əlavə, "Qarabağ" klubu mənə dəstək məqsədilə hərracda satılması üçün Xarıbülbül simvollu özəl formalar hazırladı, üzərində futbolçuların imzası ilə. Bir azarkeş üçün bunlar böyük məna kəsb edir, insana əlavə stimul, güc verir. Edilən yardımlara, dəstəklərə, xoş münasibətə görə onlara hər zaman minnətdar olacam.

Müalicəm, əməliyyatım üçün tələb olunan məbləğin böyük əksəriyyəti yığılıb. Statusumda da qeyd etdiyim kimi, cəmi 2700 manat çatışmır. Məbləğ tamamlandıqdan sonra xəstəxanaya yatırılacam və müalicə prosesim başlayacaq. Mən demək olar həyatımı xəstəliklərlə keçirsəm də, müalicə olunmamışam, heç bir tibbi yoxlanışdan keçməmişəm. Ən son 20 il əvvəl 5-6 yaşımda həkim müayinəsində olmuşam. Ondan sonra heç nə. Bu da müxtəlif səbəblərdən olub. Buna görə məndə ümumi zəiflik, immun çatışmazlığı yaranıb, çox asanlıqla xəstələnə, soyuqlaya bilirəm, viruslara qarşı həssasam. Həkimlər 30-40 günlük bir müalicə prosesinə ehtiyac olduğunu bildiriblər. Yalnız bundan sonra əməliyyatım mümkün ola bilər. Belə demək olarsa, ağır bir dönəm məni gözləyir. Ancaq düşünürəm heç nə yaşadıqlarımdan daha ağır, daha ağrılı ola bilməz. Özümü psixoloji olaraq tam hazır hiss edirəm. Bu perioda və çox inanıram, ümidliyəm".