''İlari ilə 20 ilə yaxın davam edən birgə həyatımız, təəssüf ki, başa çatdı. Münasibətdə yaranmış böhranın öhdəsindən gəlmək üçün hər şey etdim. Amma sonda nə qədər ağır olsa da, başa düşdüm ki, yollarımızı ayırmaq ən optimal variantdı. İlari ilə birlikdə üç gözəl övladımızın qayğısına qalmaqda davam edəcəyik. Elə onun özünə də hörmətlə yanaşacam''.

''Sonra mən özüm də koronavirusa yoluxdum. Həyatımın ən çətin dönəmi idi. İlari yanımda deyildi. Halbuki ona heç vaxt olmadığı qədər ehtiyac duyurdum. Ötən ilin yazında bizim münasibətlərimizdə çox ciddi böhran yarandı. Ortada heç ünsiyyət də yox idi. Ortada, ümumiyyətlə, heç nə yox idi''.

''Mətbuatda və ictimaiyyətdə yayılan söz-söhbət mənə yaşamağa mane olurdu. Övladlarımı çox sevirəm (onların Kristian, Şanel və İzabel adlı 3 övladı var – Ə. R.). Ortada 20 il davam edən bir sevgi var idi. Sonluqla bağlı çox şey təsəvvürümə gətirirdim. Amma hər şeyin məhz bu cür bitəcəyini ağlıma da gətirməzdim. Bu məsələ haqda məndən başqa hamı danışırdı. Mən isə söz vermişdim ki bir kəlmə də danışmayacam. Amma çox yalanlar oxudum. Bu yalanlar övladlarıma əziyyət verir. Yetər artıq! Mənim ona birinci xəyanət etməyim haqda deyilənlər yalandı. Ötən ilin sentyabrından etibarən İlarinin həyatında başqa insanların olması haqda qulağıma söhbətlər çatmağa başladı. Bunun mümkün olmadığını düşünürdüm. Amma ortada bir yox, bir neçə insandan söhbət gedirdi. Hətta bunu mənə ən yaxın dostlarım da deyirdi. Gec-tez məndə şübhələr yaranmağa başladı. Onunla birlikdə yaşadığımız 20 il ərzində telefonunu yoxlamamışdım. Elə o da mənim telefonumu heç vaxt yoxlamırdı. Bir gün onun telefonunu əlimə aldım və gözümə inana bilmədim. Özü də yalançı adlardan istifadə edirdi. Onun saç ustası Alessiadan hədsiz çox mesaj olduğunu gördüm. Yazışmalarda başqa-başqa yerlərdə görüşdükləri hiss olunurdu. Bunun səbəbini əvvəlcə anlamadım. Amma ''oteldə görüşərik'' mesajından sonra onun əslində Alessia yox, başqa adam olduğunu anladım. Orda başqa və lap köhnə olan mesajlar da var idi. Dünya başıma çökdü. Hər şeyi içimdə saxlayırdım. Bir dəfə İlari Milanda işlərinin olduğunu və bir neçə gün orda qalacağını dedi. Amma mən onun həmin an Milanda sevgilisi ilə olduğunu bilirdim. Böyük bir depressiyaya düşdüm. Bu mənim üçün əsl şok idi. Çünki İlarinin məndən başqa kiməsə maraq göstərə biləcəyinə inanmaq istəmirdim. Bunu heç kimə, hətta 11 yaşımdan bəri dostum olan Vito Skalaya da danışa bilmədim. Problemdən qaçan insan deyiləm, amma bir müddət heç nə olmayıbmış kimi davrandım. Əslində isə içimdə çox acı çəkirdim. Ağladığım vaxtlar da olurdu. Hələ də ailəmi qoruyub saxlaya biləcəyimi düşünürdüm. Amma bir gün İlaridən izahat tələb etdim. Əvvəlcə inkar etdi və onu tanımadığını söylədi. Sonra hər şeydən xəbərdar olduğumu anladı. Onunla, sadəcə, qəhvə içmək üçün görüşdüyünü dedi. 2021-in martında tanış olduqlarını öyrəndim. Həyatında ondan başqa da adamlar var idi! Məni depressiyadan çıxaran Noemi Bokki oldu. Amma mətbuatda ilk vaxtlar yenə yalan şeylər yazıldı. Onunla əvvəl, sadəcə, dost idik. ''Olimpiko''ya gəldiyi və bir-birimizdən uzaq oturduğumuz gün də dost idik. Onun gəlişindən həqiqətən də xəbərim yox idi. Yoxsa niyə ondan uzaqda oturum? Amma haqqımda deyilənlərdən sonra yenə çətin anlar yaşadım. Sanki mən, mən deyildim. Başqa insan idim. Belə vəziyyətlərdə hər iki tərəf günahkar olur. Başa düşürəm ki, İlariyə daha çox zaman ayırmalıydım. Mənim də günahım var. Ümid edirəm ki, iş məhkəməyə qədər gedib çıxmayacaq və İlari ilə bütün məsələlərdə anlaşaraq yeni həyatımıza başlayacağıq''.