Kilian Mbappe artıq klubunun növbəti oyunlarına hazırlaşır.

Football-plus.az xəbər verir ki, Fransa millisinin hücumçusu DÇ-2022-nin finalından sonra PSJ-nin düşərgəsində məşqlərə başlayıb.

“Ekip” nəşrinin məlumatına görə, 24 yaşlı hücumçu dekabrın 18-də Argentina ilə keçirilən finaldan iki gün sonra Paris klubunun məşqlərinə qayıdıb. PSJ rəhbərliyi DÇ-2022-də iştirak edən bütün oyunçulara milli komandasının turnirdən kənarlaşdırıldığı gündən etibarən 10 gün istirahət verib. Ancaq Mbappe düşərgəyə erkən qayıdıb. Argentina millisinin kapitanı Lionel Messi isə10 günlük istirahətdən istifadə etmək qərarına gəlib.

Yeri gəlmişkən, Mbappe Fransa millisinin yeni kapitanı ola bilər. “Ekip”in yaydığı xəbərdə bunun qapıçı Uqo Lyoris yığmadan ayrılacağı halda baş verəcəyi bildirilib. Lyoris finaldan sonra jurnalistlərin kapitan kimi qalıb-qalmayacağı ilə bağlı sualını cavablamaqda çətinlik çəkib. O, bu məsələyə yığma rəhbərliyi ilə söhbətdən sonra aydınlıq gələcəyini deyib. Bu səbəbdən Mbappenin AÇ-2024-ün seçmə mərhələsində komandanın yeni kapitanı ola biləcəyi ehtimal edilir.