İngiltərədə mövsümün sonuna 11 tur qalmış “Arsenal” ən yaxın izləyicisi “Mançester Siti”ni 5 xal qabaqlayır.

"Football-plus.az" xəbər verir ki, “topçular”ın sərgilədiyi oyunu da nəzərə alsaq, onlar uzun fasilədən sonra çempion olmağa çox yaxın görünür. Hətta bir qədər də iddialı fikir səsləndirmək mümkündü: qeyri-adi nəsə baş verməsə, “Arsenal” çempion olacaq. Bu komandanın “sükanı arxasında” bütün turnirlərdə qələbə sayını 100-ə çatdıran Mikel Arteta “Fulhem” üzərindəki darmadağından sonra jurnalistlər önünə çıxıb.

- Qələbəni necə şərh edərdiz?
- Çox sevinirəm. Yaxşı təşkil olunan komandaya qarşı çətin səfər oyunu keçirdik. Hesab edirəm ki, meydanda dominantlıq etdik, çoxlu qol vəziyyəti yaratdıq və qol buraxmadıq ki, bu da çox vacib idi. İnamlı qələbə qazandıq, bu üzdən şadam.

- Qapını toxunulmaz saxlamaq önəmlidi?
- Çox. Bir daha əmin oldum ki, 11 futbolçu 96 dəqiqəlik oyuna hazır olmalıdı. Bu məqam növbəti oyunlarda qələbə qazanmaq üçün həlledici amilə çevriləcək.

- Belə qələbələrin əhəmiyyəti nədədi?
- Böyükhesablı qələbə məni sevincin son həddinə çatdırır. Premyer-liqada 1:0 və ya 2:0 kifayət etmir. 3:0 hesabı isə oyunun axarını dəyişir. Ancaq ondan sonra daha bir hissə oynamalıydıq. Odu ki, 2-ci hissənin əvvəlində tempi bir qədər aşağı saldıq. Düşünürəm ki, uşaqlar həqiqətən güclü rəqibə qarşı möhrəşəm oyun keçirdi. Bu gün onları təbrik etmək olar.

- Leandro Trossar bu gün üç məhsuldar ötürmə verdi.
- Soyuqqanlılıqdan, düzgün ötürmə variantından, cərimə meydançasında lazımi oyunçunu tapmaqdan danışırıqsa, hər şey çox tez baş verir və bəzən futbolçular düzgün qərar vermir. Leandro isə üç qol yaratdı. İki dəfə özü də fərqlənə bilərdi – hərəkətləri heyranlıq doğurdu. Bundan başqa, cəmi bir neçə gün əvvəl zədəli idi, bərpası 7-10 gün çəkə bilərdi. O daha tez qayıtmağı çox istəyirdi. Fizioterapevtlər və həkimlər əla çalışdılar, onu sağaltmağı bacardılar. Leandronun meydanda görünməsi komandada çox şeyi dəyişir. O bizə bu gün lazım idi, qələbəyə əvəzsiz qatqı verdi. Leandro çox ağıllı futbolçudu. Dərhal baş məşqçinin düşüncələrini, ondan tələb olunanları, meydandakı rolunu anlayır və bütün bunların öhdəsindən çox yaxşı gəlir.

- 100-cü qələbəni gözləyirdizmi?
- Bilmirəm! Bu gün 100-cü qələbəni qazandığıma görə çox sevinirəm. Ümid edirəm ki, belə oyunların sayı hələ çox olacaq.

- Qabriel Jezusun dönüşü haqda nə düşünürsüz?
- Bu böyük güclənmədi! Bugünkü oyunun onun üçün münasib olub-olmayacağını bilmirdik. Bir neçə gün əvvəl mənə dedi ki, onda nəsə çatmır, dünən axşam isə gözümün içinə baxıb artıq hazır olduğunu dedi. “Fulhem”lə oyunda ona şans verdik, lazımi gücü var idi. Jesuz iki yaxşı şans yaratdı, dönüşü möhtəşəm oldu.

- Səfər oyununa gələn azarkeşlərinizlə birgə mahnı oxuyardızmı?
- Komandanı dəstəkləmək üçün onlarla birgə oxuyardım – bu dəqiqdi! Azarkeşlərimiz müstəsna idi. “Fulhem”lə oyuna gələn adamların sayı, onların münasibəti, ehtirası və enerjisi qeyri-adidi. Hər kəsə “sağ ol” deyirəm.

- Jezus start heyətində kimi əvəz edə bilər?
- İstənilən başqa futbolçu kimi, o da start heyətindəki yeri haqq etməlidi. Bizdə müxtəlif mövqelərdə oynamağı bacaran futbolçular var, hər kəs bacarıqlarına uyğun müəyyən rolu yerinə yetirir.

- Jezusun yoxluğu hücumların qurulmasına təsir göstərirdimi?
- Bəli. Biz oyunumuzu maksimum dərəcədə futbolçuların güclü yönlərinə, onları görmək istədiyimiz rollara uyğunlaşdırırıq. Trossar tam fərqli keyfiyyətlərə malikdi, nəinki Martinelli və ya Edeqor. Komandada belə universalların olması istənilən baş məşqçi üçün üstünlükdü.

- Oyundan sonra Jezusla nə haqda danışdız?
- O, son bir neçə ayda çox çalışıb, meydana dönməyi çox istəyirdi. Jezusun üzündə təbəssüm görmək çox xoş idi. Bütün komanda kimi mən də ona görə sevinirəm.

- “Fulhem”lə oyunda bu mövsümdəki ən yaxşı birinci hissəni keçirdiz?
- Yaxşı sualdı. Bilmirəm. Əlbəttə, hər üç gündən bir oynamaq çox çətindi. Avropada səyahətə çıxır, sonra geri dönürsən və yenə də meydana dominantlıq etmək istəyi ilə çıxan komandan görürsən. Möhtəşəmdi!

- Pep Qvardiola deyir ki, “Arsenal” titul uğrunda mübarizədə favoritdi.
- Bilmirəm. Biz, sadəcə, məşqlərdə çalışır və hər gün daha yaxşı olmağa çalışırıq. Bu bizim hədəfimizdi. İrəlidə hələ mövsümün böyük hissəsi durur, onu uğurla bitirməliyik.