Misli premyer-liqasında 27-ci tura start verilib.

"Football-plus.az" xəbər verir ki, "Sabah" "Zirə"nin qonağı olub - 2:0. Oyundan sonra "bayquşlar"ın çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:

- İlk hissədə hakimə çox etirazınız var idi. Sonradan sakitlik yaşandı. Bir də Amin Seydiyevin mümkün qırmızı vərəqə epizoduna toxunmağınızı istəyərdim...
- İlk epizodda sarı vərəqə verildi. Aminin birinci sarı vərəqəsi doğru idi. İkincidə isə heç nə yox idi. Amma "Zirə"nin futbolçusu səs-küy saldı. Çünki bilirdi ki, Aminin sarı vərəqəsi var. Rəqibə iki sarı vərəqə göstərilmədi. Emosionallıq bizdə də, "Zirə"də də var idi.

- Zurab Oçiqava qayıtdıqdan sonra ona şans verirsiz. Abdulaye Ba və Bəxtiyar Həsənalızadə ehtiyatda oturacaq?
- Bu, o demək deyil. İrazaballa Zurab yaxşı cütlükdü. Son oyunlarda qalib gəlmişik. Bu iki müdafiəçi birlikdə çıxış edib. Bəxtiyarın "Şamaxı" ilə matçda əli sınmışdı. İndi əli gipsdədi. Banın da zədəsi var idi. Son 2-3 gündü ki, məşq edir kollektivlə.

- Yusif İmanovun Azərbaycan millisinə dəvət alması və əsas qapıçı olacağı gözlənilir. Bu barədə fikriniz necədi?
- Bizim qapıçımız millidə birinci olsa, sevinərəm. O, buna layiqdi. Amma son söz baş məşqçinindi. Yusif sakit olmalıdı. Bir il əvvəl o, premyer-liqada oynamağa başladı. Əsas odu ki, sakit olsun. Yusifin adı çox çəkildi. Onun reaksiyası xoşuma gəldi. Sakit idi və qapısında qol buraxmırdı. Qapıçının səhv etdikdən sonra təmkinliyini qoruması önəmlidi.

- Amini Seydiyevin oyun aqressiyası sizi nə dərəcədə razı salır?
- Bu, yəqin ki, onun güclü tərəfidi. O, mübarizəni sevir. Futbolçu sərt oynayanda xoşuma gəlir. Amma sarı vərəqələr oyunun ayrılmaz hissəsidi. Aminin birinci vərəqəsindən sonra rəqib təzyiq edirdi. Tellur da yaxşı futbol oynadı.

- Mövsümün qızğın vaxtında "Beşiktaş"la oynamaq planlarınıza nə dərəcədə daxildi?
- Rəhbərliklər danışıq aparır. Yəqin ki, aprelin 20-də oynayacağıq. Millilərin fasiləsində oynamayacağıq. Bir çox oyunçumuz milliyə yollanacaq.