Misli premyer-liqasının 26-cı turunun "Şamaxı" - "Neftçi" oyunundan sonra xoşagəlməz hadisə baş verib.

Belə ki, hakimin final fitindən 3-4 dəqiqə sonra polis jurnalistlərin qanuni fəaliyyətinə yersiz müdaxilə, təzyiq göstərib. Jurnalistlərdən Kənan Məstəliyev, Mərdan Həsənov, Həbib Aslanov və Abdulla İsmayıloğlu tamaşaçılar sektorunun qarşısında çəkiliş etmək istəyərkən mülki geyimli biri özünü təqdim etmədən əvvəlcə bizə mane oldu, sonra hörmətsizlik göstərdi. Ardınca mübahisə başladı. Mübahisə zamanı Vüsal adlı həmin şəxsin Şamaxı Rayon Polis Şöbəsinin əməkdaşı olduğu aydınlaşdı. Lakin həmin şəxs mənə və münaqişəni yatırmaq istəyən digər media nümayəndələrinə təzyiqi davam etdirdi. Həmin mülki geyimlli "polis" "Futbol+" qəzetinin müxbirini bölməyə aparmaq əmri verdi. Aşağı rütbəli polis əməkdaşları qoluma girib aparmaq istəyərkən digər media nümayəndələri onları dövrəyə alaraq qanunsuz saxlamağa və fəaliyyətimizə maneə törətməyə görə etiraz edərək qarşılarını kəsdi. Qısa bir zamanda "Şamaxı"nın mətbuat katibi Yusif Hüseyn insident yerinə yaxınlaşaraq məsələnin böyüməsinin qarşısını almaqla bərabər polis əməkdaşlarının da qanunsuz müdaxilə etdiklərini bildirdi və onlara xatırlatdı ki, media nümayəndələri stadionun istənilən yerində çəkiliş edə bilər, burda da heç bir qanun pozuntusu yoxdu. Əksinə, mülki geyimli polis əməkdaşının qanunu pozduğunu bildirdi. Bununla da insident aradan qalxdı.

ABDULLA İSMAYILOĞLU