2014-cü ilin elə bu vaxtları idi...

AFFA İcraiyyə Komitəsinin iclası keçirilmiş, indi olduğu kimi, keçmiş və gələcəklə bağlı problemlər müzakirə olunmuşdu. Onda indikindən fərqli AFFA prezidenti Rövnəq Abdullayev mikrofonlar önünə çıxır, iclaslardan sonra jurnalistlərin suallarını cavablandırırdı. Yavaş-yavaş bu ənənə arxa plana keçdi. Nə isə, sözüm onda deyil. 9 il bundan əvvəlin bu günlərində keçirilən AFFA İcraiyyə Komitəsinin iclasından sonra AFFA prezidenti Rövnəq Abdullayev bütün qətiyyəti ilə bəyan etmişdi ki, mövsümün sonunda premyer-liqanı heç kim tərk etməyəcək. Məsələ belə idi ki, “Sumqayıt” sonuncu pillədə yer almışdı, mövsümün əvvəlində qəbul olunan reqlamentə əsasən “Sumqayıt” da elitanı tərk etməliydi. Cənab Abdullayevin özünün bu fikrə düşdüyünü, yoxsa o vaxtkı baş katib Elxan Məmmədovun məsləhəti ilə belə danışdığını demək çətindi. Bir şey dəqiqdi ki, Abdullayev həmin sözləri demişdi.

Sitat təxminən belə idi:

“İmkan verməyəcəm ki, “Sumqayıt” premyer-liqanı tərk etsin. Orda azərbaycanlı gənclər (?!) oynayır, belə də davam etməlidi. “Sumqayıt” premyer-liqada qalacaq”.

Dünyanın heç bir yerində futbol qurumunun özünə hörmət edən prezidenti belə sözlər danışmaz, idman prinsiplərinə tüpürməzdi. Azərbaycanda isə biz çoxdandı belə şeylərə təəccüblənmirik. Elə o vaxt da təəccüblənmədik. Məsələ belə idi ki, “Sumqayıt”ın sonuncu pillədə yer alması komandanın premyer-liqadan düşməsini qaçılmaz edirdi. Bu isə AFFA-da yer alan məlum qruplaşmanın maraqlarına uyğun deyildi. Onlar “Sumqayıt”ın vasitəsiylə xaricdə “qaraladıqları” futbolçuları Azərbaycana gətirir, həmin futbolçulara pasport verib “milliləşdirirdilər”. Bundan sonra da o “milliləşdirilən” futbolçunun qiyməti yüksəlirdi, onun transferindən pul qazanırdılar. “Sumqayıt”ın premyer-liqadan düşməsi isə bu biznesin önünü kəsəcəkdi. Buna görə də idman prinsiplərinə və elitada mübarizə aparan digər klubların üzünə tüpürmək bahasına olsa belə, “Sumqayıt” elitada saxlanılmalı idi.

2014-cü ilin bu aylarında “Sumqayıt” “Rəvan”la sonuncu olmamaq uğrunda mübarizə aparırdı. Bu işə AFFA-nın “qara paltarlıları”, eləcə də qurumun təsir dairəsində olan klublar dəstək verirdi.

Onlar meydanda “Rəvan”a qarşı dişləri-dırnaqları ilə mübarizə aparır, “Sumqayıt”a vacib xalları peşkək etməyə hazır görünürdülər. “Rəvan”ın baş məşqçisi Kamal Alispahiç və klub rəhbərliyi də bu aralar ölkə kubokunun yarımfinalına yüksəlməyin eyforiyasını yaşayırdı. “Rəvan” yarımfinalın ilk oyununda “Neftçi” ilə səfərdə heç-heçə etmişdi, cavab görüşü Bayılda, “sarı-qırmızılar”ın doğma meydanında keçirilirdi. AFFA prezidentinin məlum açıqlaması paytaxt klubunun başının altına yastıq qoydu, onlar elitanı tərk etmək qorxusunun olmadığını düşünərək əsas diqqəti “Neftçi” ilə cavab oyununa yönəltdi. Komandanın əsas legionerlərinə istirahət verildi, guya ki, onlar güclərini qoruyub, “Neftçi”ni finala gedən yollarından kənarlaşdıracaqdılar. Nəticə necə oldu? “Rəvan” “Neftçi”yə uduzdu, finala çıxa bilmədi. Buna qədər isə çempionatdakı həlledici görüşdə “Sumqayıt”a da məğlub olmaqla onlarla yerini dəyişdi, sonuncu pilləyə yuvarlandı.

Bu yerdəyişmə baş verən kimi AFFA “valı dəyişdi”, reqlament yada düşdü. Elxan Məmmədovun da, İcraiyyə Komitəsinin üzvlərinin də yadına düşdü ki, mövsümün əvvəlində qəbul edilən reqlamentə görə sonuncu yerin sahibi elitadan getməlidi. İş o yerə gəlib çatmışdı ki, yeni mövsümün startına qədər bu məsələnin ətrafında müzakirələr davam etdirildi, sonda “Rəvan”ın qətlinə fərman verməkdən çəkinmədilər. Bütün bunlar Samir Abasovun “Futbol+”ə verdiyi müsahibəni oxuyandan sonra bir daha kino lenti kimi gözümün önündən keçdi. Həmkarım Rəşadın Samir bəyə verdiyi “bəs idman prinsipi” sualının cavabına diqqət edin: “biz öz qayadaları olan futbol ölkəsiyik. Nə idman prinsipi?”

Samir Abasov soruşmaq istəyir, amma soruşmur ki, “Sumqayıt” premyer-liqaya idman prinsipiylə gəlib? Onu neçə illərdi orda idman prinsipi ilə saxlayırlar? Yoxsa Kamran Quliyev “Sumqayıt”ın prezidenti kimi yuxudan oyanıb, axşam yatağına “Neftçi”nin prezidenti kimi girəndə həmin prinsiplər qorunurdu? Adam düz deyir, ay AFFA rəsmiləri. Nə əkmisizsə, indi də onu biçin. 9 ildə Azərbaycan futbolu bir addım irəli getməyib. Onda da “Sumqayıt” “zirzəmi”də idi, sizin Azərbaycan futbolunun gələcəyi kimi baxdığınız “Sumqayıt”. İndi də ordadı. Elə AFFA-nın rəhbərliyi də həmin adamlardı.

Ayıbınıza kor olun!

AMAL