Azərbaycan millisi martın 24-ü və 27-də iki rəsmi oyun keçirəcək.

“Football-plus.az” xəbər verir ki, Canni de Byazinin komandası seçmə mərhələdə Avstriya və İsveçlə səfərdə qarşılaşacaq. Hələ ki yığmanın heyəti açıqlanmayıb. Mediada və ictimaiyyət arasında De Byazinin milliyə kimləri çağıracağı müzakirə olunur. Bu və başqa məsələlərə aydınlıq gətirmək üçün italiyalının köməkçisi Arif Əsədovla əlaqə saxladıq.

- Əvvəlcə Emil Mustafayevdən başlayaq. “Aleksandriya”nın üzvü milliyə dəvət olunacaq? Nəzərinizə çatdıraq ki, yarımmüdafiəçi U-21 yığmasının heyətində çıxış edib.
- Fikrimcə, bu sual mənə aid deyil. Əvvəlcə baş məşqçi qərar verməlidi. Daha sonra federasiya onun yığmaya çağrılması ilə məşğul olmalıdı. Real nəsə olmasa, Emillə bağlı nəsə deyə bilmərəm. Bu suala ən doğru cavabı Canni de Byazi verə bilər.

- Millimizin Avstriya və İsveçlə oyunlar üçün heyəti nə vaxt açıqlanacaq?
- Qarşıda Misli premyer-liqasının 2 turu var. Böyük seçim imkanımız var. Konkret adlar hələ bəlli deyil. Bu, premyer-liqanın qarşıdakı 2 turundan sonra bilinəcək. Yekun siyahı da, bildiyiniz kimi, AFFA-nın rəsmi saytı vasitəsi ilə ictimaiyyətə təqdim olunacaq. Hələ vaxtımız var. Bu səbəbdən də tələsmək lazım deyil.

- Onda sualı belə qoyaq: heyətdə hansısa dəyişiklik və ya yenilik gözlənilir?
- De Byazi bununla bağlı müsahibə verib. Son seçmə mərhələdəki heyəti saxlamaqla hansısa dəyişikliklər ola bilər. Təbii ki, yeni adlar da siyahıya salına bilər. Yenə deyirəm, qarşıda 2 tur var.

- Ölkə xaricində çıxış edən futbolçularımız var. Mahir Emreli ilə Renat Dadaşov sizə tanışdı. Amma Dmitri Nağıyev və Dmitri Nazarov kimi oyunçular hazırda öz klublarında yaxşı performans sərgiləyir. Onlardan hansısa yığmaya dəvət oluna bilər?
- Mahirlə Renat mütəmadi olaraq milliyə çağrılır. Digərləri də diqqətimizdədi. Bir daha söyləyirəm, yekun qərarı De Byazi verir. Siyahı açıqlananda hər şeyi biləcəksiz. Amma həm çağrılanlar, həm də çağrılmayan futbolçuları həmişə diqqətdə saxlayırıq.

- AFFA İcraiyyə Komitəsinin son iclasında qərar verildi ki, bu mövsüm premyer-liqanı bir komanda tərk edəcək. Hazırda 4 klub sonuncu olmamaq üçün mübarizə aparır. Bu rəqabət milliyə xeyir verə bilər? Özünüz də dediz ki, qarşıda 2 tur var. Bu görüşlərin nəticələrinə, oyunçuların performansına uyğun həmin kollektivlərdən kimsə yığmaya çağrıla bilər?
- Rəqabət olan yerdə inkişaf da olur. Son illərlə müqayisədə indi çempionat daha gərgin keçir. Son pillələrdə yer alanlar gərgin mübarizə aparırlar. Çünki heç kim sonuncu olmaq istəmir. Belə olan halda da futbolçuların keyfiyyətləri də, milli komanda üçün şansları da artır.

- Növbəti mövsüm premyer-liqa, birinci divizion və əvəzedicilərin çempionatında ümumilikdə 30 komanda mübarizə aparacaq. Bu məqam keyfiyyətli futbolçu çatışmazlığını aradan qaldıracaq?
- Liqaların ayrılması futbolçuların daha çox oynamasına təsir edir. Artıq praktiki cəhətdən hazır oyunçuların sayı artır. Lakin bu, əsas milliyə çox təsir etməyəcək. Digər yığmalara isə xeyri olacaq. U-19 və U-21-ə daha çox əvəzedicilərdən və 1-ci diviziondan oyunçular seçilir. Əsas milliyə seçim imkanını artırmaq üçün gələcəkdə premyer-liqada iştirak edəcək kollektivlərin sayını artırmaq lazımdı.

İLKİN SULTANLI