Rusiyanın “Sport-Ekspress” qəzeti transfermarkt.de saytının rəqəmlərinə əsaslanmaqla bu ölkənin çempionatında qışda reallaşan ən bahalı transferlərin ilk “10-luğ”unu hazırlalayıb.

Siyahıya 4 milyon avro müqabilində “Serro Portenyo”dan “Spartak”a keçən Aleksis Duarte başçılıq edir. Maksim Qluşenkovla (“Krılya Sovetov”dan “Lokomotiv”ə) Sergey Pinyayev (“Krılya Sovetov”dan “Lokomotiv”ə) hərəyə 2,6 milyon avro ilə 2-3-cü yerləri bölüşür. Transferi 2 milyon avroya dəyərləndirən üç futbolçu isə bunlardı: Nuralı Alip (“Kayrat”dan “Zenit”ə), Kadi Borjes (“Qarabağ”dan “Krasnodar”a), Tomaş Tavareş (“Benfika”dan “Spartak”a). “Qarabağ”ın braziliyalı futbolçusunun “Krasnodar”a 4,8-5 milyon avro qarşılığında keçdiyi bəllidisə, transfermarkt.de saytının və Rusiya qaynaqlarının 2 milyon avronun üzərində dayanmasının səbəbi anlaşılmır. Bizdə olan bilgiyə görə, Rusiya klubu ilk mərhələdə pulun 2 milyonunu, yayda isə qalanını ödəyəcək. Hərçənd Kadini real transfer qiyməti ilə bu siyahının önündə görmək bizə daha xoş olardı.

ORXAN