Ötən il sentyabrın 12-də karyerasını başa vurduğunu açıqlayan, son dönəmlərdə məşqçilik kurslarına getməsi ilə diqqəti çəkən və Türkiyənin gənclər yığmasının başına keçəcəyi gözlənilən Arda Turanla bağlı sürpriz bir iddia ortaya atılıb.

"Football-plus.az" xəbər verir ki, İspaniyanın yüksək tirajlı nəşrlərindən biri olan “Sport”un şok iddiasına görə Türkiyə yığmasının sabiq üzvü İspaniyada oynadığı dönəmdə vergidən yayındığı üçün bu məsələnin araşdırılmasına start verilib.

Bilindiyi kimi, 35 yaşlı Arda İspaniyada iki klubun şərəfini qoruyub. O, 2011-15-ci illərdə “Atletiko”da top qovduqdan sonra 2015-in yayında 34 milyon avroya “Barselona”ya transfer olunmuşdu. Kataloniya nəhəngindıəki karyerası uğurlu alınmayan Turan 2020-də müqavilə müddəti başa çatdığı üçün klubdan ayrılaraq vətəninə qayıtmışdı. Şayiələrə inansaq, vergidən yayınmaq üçün gəlirini dövlətdən gizlədən Ardanın ümumilikdə 828 min avro borcu var.

Xəbərdə qeyd olunur ki, İspaniyada İqtisadi Cinayətlər üzrə Prokurorluq bu məsələ ilə bağlı hələ 2021-ci ildə şikayət edərək araşdırmanın başlanmasını tələb etsə də, onların arzusu yalnız indi reallaşıb. “Qalatasaray”ın sabiq üzvü konkret desək, 2015-ci ildə 500 min avro, 2016-cı ildə 328 min avrodan çox vergidən yayınmaqda günahlandırılır. Ardanın məhkəməyə çıxmaq ehtimalı yüksəkdi. Amma “Sport” nəşrinin digər iddiasına görə,

Arda əvvəlcədən məhkəmə ilə anlaşıb bu məbləği ödəməyə razılıq versə, cəza almamaq ehtimalı da mövcuddu.