Paulo Dibala müəyyən müddətə cəzalanmaq təhlükəsi ilə üzləşib. “Roma”nın hücumçusu sabiq klubu “Yuventus”la gizli razılaşmaya görə bir ay müddətinə futboldan uzaqlaşdırıla bilər.

Football-plus.az xəbər verir ki, “La Repubblica” qəzetinin yaydığı xəbərdə polisin bu məsələyə görə Dibalanı sorğu-suala çəkdiyi bildirilib. İtaliya prokurorluğu 2020-ci ildə koronavirus pandemiyası zamanı “Yuventus”un futbolçuların maaşlarını süni şəkildə azaltmaq üçün maliyyə fırıldaqçılığı ilə bağlı cinayət işinin təhqiqatını davam etdirir. Müstəntiqlərə görə, Turin klubunun əvvəlcə bəyan etdiyi kimi, Dibala həmin dövr üçün bir neçə aylıq maaşından imtina etməyib, lakin ödənişi təxirə salmağa razılaşıb və sonradan 1,9 milyon avroluq iki ödəniş şəklində tələb olunan məbləği alıb. İtaliyanın İdman Ədaləti Məcəlləsinə əsasən, klublara bu şəkildə təzminat ödəmək qadağandı. Oyunçular isə bu cür kompensasiyaları qəbul edə bilməzlər. Belə qayda pozuntusu sübut olunarsa, həmin futbolçu ən azı bir ay müddətinə futboldan kənarlaşdırılacaq.

Xatırladaq ki, Dibala “Yuventus”da 2015-22-ci illərdə çıxış edib. İtaliya Futbol Federasiyası yanvarda futbolçuların maaşları ilə bağlı maliyyə saxtakarlığı etdiyi üçün komandanı A seriyasında qazandığı 15 xaldan məhrum edib.