Heç şübhəsiz, avrokuboklarda qələbə həm də klubların büdcəsinə yetərincə yüksək məbləğdə pul daxil olması deməkdi.

Football-plus.az xəbər verir ki, “Gent”in baş məşqçisi Heyn Vanhazebruk dünənki mətbuat konfransında bu məqamın üzərində də xüsusi şəkildə dayanıb, “Qarabağ”ı sıradan çıxarmağın komandasına 600 min avro qazandıracağını deyib.

Belçikalı mütəxəssis düz deyir. Toplam 325 milyon mükafat fonduna malik Konfrans Liqasında 1/8 finala adlayan komandalar üçün məhz bu qədər pul nəzərdə tutulub. Təbii, ümid edirik ki, həmin para “Gent”ə yox, Azərbaycan çempionuna çatacaq. Necə deyərlər, iştah diş altındadı. “Qarabağ” 1/8 final mərhələsini də arxada qoysa, artıq 1 milyon avro irəli düşəcək.

Öz aramızdı, kiçik məbləğ deyil! Oyunun başlamasına bir saat qalmış mükafat məbləğini xatırlatmağa dəyər.

Pul öz yerində, Azərbaycan “Qarabağ”dan ilk növbədə mərhələ adlamağı gözləyir.

ORXAN