Zəlzələ üzündən ciddi zərər görən şəhərlərdən biri də Malatyadı.

Football-plus.az xəbər verir ki, 1-ci liqada çıxış edən və 2-ci qapıçısı Ahmet Eyup Türkaslanın dağıntılar altında qalaraq dünyasını dəyişən “Yeni Malatyaspor” çempionatdan çəkilən klublardan biridi.

Bu arada malatyalıların təcrübəli yarımmüdafiəçisi Barış Başdaş zəlzələ anında yaşadıqlarını Almaniyanın ZDF kanalı ilə bölüşüb. Almaniyanın Köln şəhərində doğulan 33 yaşlı futbolçu, demək olar, bütün peşəkar karyerasını Türkiyədə keçirib. “Kasımpaşa”, “Göztəpə”, “Adana Dəmirspor”, “Karabükspor”, “Alanyaspor”, “Fatih Karagümrük”, “Samsunspor” və son olaraq “Yeni Malatyaspor”da çıxış edən Barış yalnız 2020/21-də “Hannover-96”nın şərəfini qoruyub. Zəlzələ anında klubun bazasında olan, 2-ci mərtbədən aşağı tullanan və ayağından xəsarət alaraq xəstəxanaya yerləşdirilən futbolçu bunları deyib:

“Həmin vaxt yuxuya getmişdim. Birdən-birə hər şey tərpənməyə başladı. Oyandıqdan sonra ilk 3-4 saniyə ərzində nə baş verdiyini anlamağa çalışdım və çarpayının sağ tərəfindən yerə yıxıldım. Bir anlıq elə zənn etdim ki, Türkiyəyə atom bombası atıblar. İşıqlar söndü. Divarlardan daşlar və toz-torpaq tökülürdü. Ayağa qalxıb qaçmağa başladım. İkinci mərtəbədən aşağı tullandım. Ayağım burxuldu. Amma yanımda məndən də pis vəziyyətdə olan və hər yeri qan içində olan komanda yoldaşımı gördüm. Hava dəhşətli dərəcədə soyuq idi. Qar yağırdı və buz kimi bir hava var idi. İnsanların böyük əksəriyyəti həmin an yatdığı üçün əyinlərində qalın paltar yox idi. Kimin əynində nə var idisə, onunla da çölə çıxmışdı. Bir çox insanın evə qayıdaraq paltar götürməyə də fürsəti olmadı”.

Barış Başdaşdan sonra ZDF kanalına telefonla Türkiyə yığmasının baş məşqçisi Ştefan Kunts bağlandı. Almaniyalı mütəxəssis İstanbul nəhəngləri “Beşiktaş”, “Qalatasaray”, “Fənərbaxça”nın zəlzələ qurbanları üçün ümumi bir kampaniyaya başlamaq istədiklərini və dostluq matçları üçün Almaniya Futbol İttifaqı ilə danışıq apardıqlarını dedi. Oyunlardan əldə olunacaq gəlir yardım kampaniyasına köçürüləcək.