Misli premyer-liqasında 23-cü tura yekun vurulub.

“Qarabağ” “Zirə”ni məğlub edib. Oyundan sonra qəsəbə təmsilçisinin çalışdırıcısı Rəşad Sadıqovun mətbuat konfransı keçirilib. Sizi mütəxəssisin fikirləri ilə tanış edirik:

- Toni Qomeş Antalya toplanışında yaxşı idi. Amma premyer-liqa oyunlarında meydana ehtiyatdan buraxırsız. Səbəb nədi?
- İki-üç futbolçumuz var ki, onları əsas heyətdə meydana buraxmaq istəyərəm. Amma rəqabətdi. Hansısa futbolçuya keyfiyyətinə görə üstünlük verirsən. Bu gün Rüstəmə üstünlük verdik. İkisi arasında seçim edirdik. Toni soldan daha effektivdi. Orada rəqabət yüksəkdir. Toniyə daha çox şans vermək istəyirəm. Məşqlərdə də özünü yaxşı göstərir. Oyun elə gedirdi ki, dəyşiklik oyunu sındırardı. Ona görə sonda şans verdim. Rəqib böyük qüvvə ilə irəli atılmışdı. Məcbur idik müdafiəni düşünüb, əks-hücumlarda rəqibi yaxalayaq. Eldar Quliyev epizoddan daha yaxşı istifadə etsəydi, qolla nəticələnərdi.

- Eldar Quliyevin çıxışı ilə bağlı fikriniz necədi?
- Eldar hələ hazır deyil. Son rəsmi oyununu noyabrın sonunda oynayıb. Toplanış da keçməyib. Bu gün şans verdim ki, çempionatımızı hiss etsin. Hərəkətli futbolçudur. Hücumları yaxşı bacarır deyə, fikirləşdim ki, həm müdafiədə, həm də əks-hücumlarda faydalı olar. Əslində, effekt vermişdi. Bəlkə də, qol epizodunda daha erkən zərbə vura bilərdi. Bu gün meydanda göstərdikləri məni sevindirdi.

- Epizodları vursaydız, hər şey fərqli olacaqdı? - Bilmək olmazdı. Bəlkə də "Qarabağ" daha da böyük qüvvə ilə irəli atılardı. Buradakı 1:7 hesabı ilə uduzduğumuz matçda ilk qolu biz vurmuşduq. Bu cür komandalarla oyunda sonradan fərqlənmək daha yaxşıdır. Qurban Qurbanov heyətdə rotasiyalar edir. Nə qədər rotasiyalar etsələr də, güclü heyətə malikdilər.

- Əvəzetmələri tez etmək olmazdı?
- Nəticəyə görə dəyişiklik edən məşqçi deyiləm. Hər şey yaxşı gedirdi deyə etmədim.

- Demək olar ki, bu mövsüm "Qarabağ"a qarşı ən yaxşı oyununuzu oynadız?
- Elə demək olar. Bu il bir matçda böyük hesabla uduzmuşduq, birində də heç-heçə olmuşdu. Bu gün imkanlarımız da var idi. Əks-hücumlarımız olurdu. istifadə edə bilmədik. Son 7-8 oyunu yaxşı keçiririk. Bircə "Səbail"lə zəif idik. Söz vermişəm ki, danışmayacam. Səbrli olmalıyıq.

- Eldar Quliyev yerli pasportla oynayacaq gələcəkdə?
- Onu transfer etdikdə, özünə də demişdim ki, yerli gözü ilə transfer etmirəm. Bir ildir ki, istəyirdim onu. Sevinirəm ki, gəldi bizə. Azərbaycanı seçib oynasa, bir azərbaycanlı kimi məni sevindirəcək. Legioner kimi də oynasa, buna özü qərar verəcək. İstəyərəm ki, millimizdə oynasın. İstedadlıdır. Son illərdə onun kimi istedadlı oyunçuları milliyə qazandırmışıq. Eldarın da onlardan biri olmasını istəyərdim.

- Hakimlikdən narazı qaldız?
- Bugünkü hakimlikdən razı qaldım. Yaxşı hakimlik var idi. Ciddi iradım yoxdur. Epizodlara etiraz ediriksə, o demək deyil ki, narazıyıq.

- Əsasən dördüncü hakimə etiraz edirdiz...
- Əksinə. Mehriban dialoqumuz var idi.