İbrahima Vaci böyük sevinc içində və az qala qaçaraq düşərgəsinə qoşulduğu “Sent-Etyen”də heç də xoş gün görmür.

Əlbəttə, bir futbolçunun taleyinə komandadan kənarda baxmaq çətindi. Onda demək lazımdı ki, Fransanın onqat çempionu əməllicə dibə vurub. “Yaşıllar” 21 turdan sonra 18 xalla 20 komanda arasında 19-cu yerdə qərarlaşıb. Yəni “Sent-Etyen” bu gedişlə elitadakı yox a, aşağı dəstədəki yerini də itirə bilər. “Qarabağ”da ulduz olan, qolları sıralayan seneqallı hücumçunun da öyünə biləcəyi statistika yoxdu. Əsasən əvəzetmədən olmaqla 14 oyuna çıxıb, cəmi 3 qol vurub. “Sent-Etyen” son turda səfərdə “Bastiya”ya 0:2 hesabıyla uduzub. “Yaşıllar”ın baş məşqçisi Loran Battle 73-cü dəqiqədə - artıq hesab 0:2 olandan sonra İbrahimanı meydana buraxıb ki, o da heç nə ilə yadda qalmayıb. Bir sözlə, “Qarabağ”da kral olan seneqallı Fransada heç kimdi! Cəfər Cabbarlının “Sevil” pyesindən o məşhur ifadə yadıma düşdü: gör nə günlərə qaldın, Balaş...

ORXAN