Tennisdə ilin ilk ''böyük dəbilqə'' seriyalı turniri olan ''Australian Open'' davam edir.

Football-plus.az xəbər verir ki, bu gün kişilərin mübarizəsində ilk yarımfinalçılar məlum oldu. Yarımfinala yüksələnlərdən biri Karen Xaçanovdu.

Erməniəsilli 26 yaşlı rusiyalı tennisçi bu turnirdə tək öz oyunu ilə yox, siyasətə yersiz şəkildə burun soxması ilə diqqət çəkir.

Bilindiyi kimi yanvarın 20-də 1/16 finalda amerikalı Frensis Tiafonu 3:1 hesabı ilə məğlub etdikdən sonra Xaçanov kameranın üzərində ''Artsax stay strong'' (Artsax möhkəm ol) ifadəsini yazmışdı. Yəni o, tennisçilərin qələbəni qeyd etmə şəklindən bir növ siyasi platforma kimi istifadə etmişdi.

Azərbaycan Tennis Federasiyasının (ATF) buna reaksiyası gecikmədi. Növbəti gün qurum bəyanat yayaraq bu təxribatın yolverilməz olduğunu və məsələ ilə bağlı Beynəlxalq Tennis Federasiyasına (İTF) etiraz məktubu göndərildiyini açıqladı. İlk hərəkətindən sonra ermənilərin (və aparıcı Nobel Arustamyanın) gözündə ucaldığını görən Xaçanov 1/4 finalda bir qədər də ''irəli getdi''.

O, yaponiyalı Yoşihito Nişiokanı 3 setdə yendikdən sonra bu dəfə kameranın üzərində ''sona qədər inanmaqda davam et, Artsax möhkəm ol'' yazdı. Bu dəfə lap ağını çıxartdığına görə məsələyə Azərbaycan Respublikası Gənclər və İdman Nazirliyi də qarışdı. Nazirlik də ATF ilə əl-ələ verərək həm Rusiya Tennis Federasiyasına, həm Beynəlxalq Tennis Federasiyasına, həm də sözügedən turnirin təşkilatçılarına müraciət ünvanladı.

Xaçanovun cəzalandırılması və belə bir halın təkrarlanmasına yol verilməməsi tələb olundu. Bu gün Xaçanov növbəti oyununa çıxdı. Daha öncə 1/16 finalda digər rusiyalı tennisçi Daniil Medvedevi mübarizədən kənarlaşdıran Sebastyan Korda bu dəfə biləyindəki zədə üzündən eyni uğuru təkrarlaya bilmədi. İlk 2 setdə 6:7, 3:6 hesabları ilə uduzan Korda 3-cü setdə hesab 0:3 olarkən oyundan çəkildi. Bununla da Xaçanov karyerasında 2-ci dəfə ''böyük dəbilqə'' seriyalı turnirdə yarımfinala yüksəldi. O, bunu ötən il ''US Open''də də bacarmış və yarımfinalda turnirin gələcək qalibi ispaniyalı Karlos Alkarasa uduzmuşdu. Bu dəfəki qələbədən sonra Xaçanov vərdişindən əl çəkərək təxribata əl atmadı.

Oyundan sonra ''miks zona''da isə ona maraqlı suallar verildi. ATF-in onun cəzalandırılmasını tələb etməsi məsələsi barədə ''bu haqda heç nə eşitməmişəm'' deyən tennisçi ''sizə kamerada artıq belə şeylər yazmamaq barədə xəbərdarlıq edilibmi'' sualına isə ''hələ ki yox'' cavabını verdi. Elə həmin müsahibəsində Xaçanov bəh-bəhlə 2021-də ailəsi ilə birlikdə 10 günlük Ermənistanı ziyarət etməsindən danışdı və ölkənin gəzməli yerlərində gəzdiyini, uşaqlar üçün master-klass keçdiyini dedi. Yəni göründüyü kimi ona hələ ki, güldən artıq söz deyilməyib.

Qeyd edək ki, Rusiya və Belaruslu tennisçilər ''Australian Open''də neytral bayraq altında çıxış edirlər. Xaçanovun oyunları zamanı tribunada Qondarma Dağlıq Qarabağ Respublikasının bayraqlarına da rast gəlmək mümkündü!