Peşəkar Futbol Liqasının media və marketinq direktoru Sənan Abdullayev bu qurumun Antalyaya yollanan əməkdaşlarının işi ilə bağlı hesabat verib: "Antalyadan 10 günə 13 oyunu canlı yayımla təqdim etdik. Hətta sonuncu gündə 1 günə 3 matç yayımladıq. Vəzifəsindən asılı olmayaraq hər kəs zəncirvari iş gördü. Yağışa, küləyə düşməyimizə baxmayaraq, 8 nəfərlik heyətlə oyunöncəsi, oyunsonrası açıqlamalar alındı, hətta fasilədə də qonaqlar, rəsmilər dəvət olundu. Baş məşqçilərdən Cianni De Byazi, Qurban Qurbanov, Murad Musayev, Ayxan Abbasov, Elmar Baxşiyev, Şahin Diniyev, rəsmilərdən “Şamaxı”nın idarə heyətinin sədri Elçin Usub, “Turan Tovuz”un icraçı direktoru Nadir Nəbiyev, futbolçulardan Adama Diakabi, Denis Marandiçi, Asif Məmmədov, Elvin Məmmədov, Kamal Bayramov, “Qarabağ”ın mətbuat katibi Gündüz Abbaszadə, “Sabah”ın mətbuat katibi Elnur Həmidov, menecer Erkin İbrahimovun fikirlərini çatdırdıq. Bakıdan da tam dəstəklə bacardığımızın maksimumunu etdik. Yorğun, amma komanda işinin zövqünü yaşayaraq döndük!"