PFL rəsmisi Murad Musayevin iradları ilə razılaşmadı
Qış-təlim məşq toplanışını davam etdirən “Sabah”ın baş məşqçisi Murad Musayev bir neçə gün öncə mətbuata açıqlamasında maraqlı fikirlər səsləndirib.
Football-plus.az xəbər verir ki, rusiyalı mütəxəssis fasilədən sonra ardıcıl üç premyer-liqa matçının həftəiçinə salınmasından narazılığını dilə gətirib. O bildirib ki, oyunlara azarkeşlərin gəlməməsi, tribunaların boş qalması məhz bu səbəbdəndi. Həftəsonuna salınan qarşılaşmalarda isə futbolsevərlər iş vaxtı və ya başqa problemlə üzləşmədən stadiona gələ bilirlər.
Maraqlıdı, Murad Musayev iradında nə dərəcədə haqlıdı? Onun bu fikirləri nəzərə alınacaqmı? Bu suallarla PFL-in texniki direktoru Elgiz Abbasova müraciət etdik:
“Murad Musayevin çempionatın təqvimi ilə bağlı verdiyi açıqlamadan xəbərdaram. Lakin məncə, oyunların təqvimindən danışarkən, təkcə fasilədən sonrakı 3 turu nəzərə almaq lazım deyil. Bütün mövsümü nəzərə almaq daha məqsədəuyğundu. Ötən mövsümlə müqayisədə premyer-liqada komandaların sayı artıb. Bu da o deməkdi ki, artıq 28 yox, 36 oyun keçiriləcək. Mövsümlük təqvim həftələrin sayını artırmadığı üçün bu vacib amildi. Bunu nəzərə almaq lazımdı, çünki komandalar 7 gündən bir oynasa, o zaman futbolçuların dincəlməyə, ailələri ilə vaxt keçirməyə, milli komanda üçün toplaşmağa vaxtı olmayacaq. Yuxarıda göstərilən amilləri nəzərə alsaq, 36 turdan ibarət çempionatda həftənin ortasında bəzi turların keçirilməsi çox normal haldı. Bütün oyunların həftəsonları keçirilməli olduğunu bildirən bir qayda yoxdu. Tribunalardakı azarkeşlərin sayına gəlincə, artıq bu mövsümün 14-cü turunda keçmişin ümumi göstəricisini ötmüşük. Yeri gəlmişkən, bunda “Sabah”ın da böyük rolu var. Cari mövsümdə komandanın azarkeşlərinin sayı xeyli artıb. Təqvimlə yanaşı, tribunalardakı azarkeşlərin sayı və komandanın göstərdiyi oyunun səviyyəsi də bu prosesdə böyük rol oynayır. “Sabah” – “Neftçi” görüşünü potensial yüksək marağı nəzərə alaraq saat 19.00-a təyin etdik. Murad Musayevin “bu cədvəl təlim-məşq toplanışına qədər olsaydı, hazırlıq mərhələsi bir az fərqli qurulardı” fikrinə gəlincə, bununla da razılaşa bilmərik. Səbəb odu ki, biz çempionatın təqvimini hələ ötən ilin avqustunda idman ictimaiyyətinə, klublara göndərmişdik. Yəni artıq avqustda qış fasiləsindən sonra həftənin ortasında iki turun baş tutacağı məlum idi. Bunun da səbəbləri var. Klublarımız qış təlim-məşq toplanışı zamanı 3-4, bəzən isə 2 gündən bir yoldaşlıq oyunu keçirir. Bu o deməkdi ki, onlar belə gərgin qrafikə alışırlar. Yəni sırf məntiqlə iki dövrəni daha qısa fasilə ilə keçirən klublar həftəlik tsiklə keçir. Beynəlxalq qaydalara görə, iki rəsmi oyun arasında 48 saatlıq fasilə nəzərə alınarsa, bu kifayətdi. Amma bizim çempionatda oyunlararası fasilə ən azı 5 gündü. Ona görə də hesab edirik ki, burda hətta müzakirəlik heç nə yoxdu. Bütün mövsüm üçün təqvimi tərtib edərkən klubları, avrokuboklarda iştirak edənləri, ölkə kubokunun oyunlarını, mühüm dövlət tarixlərini, matçlar arasında balansı və başqa vacib məqamları nəzərə almışıq. Hər turun, matç gününün öz məntiqi izahı var və biz hamı üçün ən yaxşı variantı tapmağa çalışırıq”.
ŞAİR ABDULLA
Digər xəbərlər
