Rusiyanın championat.com saytında maraqlı yazı yer alıb.

Yazıda afrikalı futbolçuların süni yazazaltması ilə bağlı çılpaq faktlar yer alıb. Belə ki, 40 qaradərili futbolçudan 25-nin yaşını qəsdən azaltması aşkarlanıb. Görəsən, klublarımız da nə vaxtsa belə halla üzləşib? Qaradərili futbolçların transferi zamanı bu məqama diqqət yetirirlərmi? Bu suallarla elita təmsilçilərinə müraciət etdik.

Rüstəm Allahverdiyev (Neftçi): "Bizdə baxışa çağırdığımız və ya transfer etdiyimiz afrikalı futbolçularda “lipa” ilə bağlı qanun pozuntusu aşkarlanmayıb. Heç bundan sonra da belə halın baş verməsini istəmərik".

Azad Mustafayev (Kəpəz): "Futbolda “lipa” halları ilə bağlı zaman-zaman mətbuatdan xəbərləri oxuyuruq. Azərbaycan çempionatında bunun olub-olmadığını deyə bilmərəm. Amma "Kəpəz"də çıxış etmiş qaradərili futbolçularla bağlı heç bir problem olmayıb".

Elmar Abdullazadə (Zirə): “Belə problemlə üzləşməmişik. Ümumiyyətlə, klubumuzun təcrübəsində belə şey olmayıb".

Rəşad Məmmədov (Sumqayıt): "Qeyd olunan “lipa” məsələsindən xəbərdarıq. Klubumuzda uzun illər yerli və “milliləşdirilən” futbolçular çıxış edib. Son 6 ayda isə heyətə legionerlər cəlb etmişik. Qışa qərər heyətimizdə 3 qaradərili oyunçu vardı ki, onların heç birində yaş azaltması halları olmayıb. Heyətə yeni cəlb etdiyimiz Tisdellə Karioka da qaradərilidi. Onlarda da “lipa” problemi aşkarlanmayıb. Gələcəkdə bu məsələylə bağlı daha dərin araşdırma aparacağıq".

Süleyman Tağıyev (Turan Tovuz): "Hələ ki “lipa” ilə bağlı problem yaşamamışıq. Belə hal olsa, aidiyyatı qurumlara şikayətimizi bildirərdik".

Sənəm Fərhadova (Səbail): "Belə halla rastlaşmamışıq".

Elnur Həmidov (Sabah): "Açığı, indiyə kimi belə halla rastlaşmamışıq. Amma rastlaşsaq, bu məsələ ilə bağlı araşdırma aparılacaq, müvafiq tədbirlər görüləcək".

ABDULLA İSMAYILOĞLU