Futzal yığmamızın və "Araz-Naxçıvan"ın baş məşqçisi Joze Alesio da Silva qəzetimizin ötən sayına müsahibəsində maraqlı çağırış etmişdi.

Football-plus.az xəbər verir ki, braziliyalı mütəxəssis premyer-liqa klublarının futzal komandaları yaratmasının millinin və futzal çempionatının inkişafına təkan verəcəyini söyləyib. Görəsən, elita təmsilçiləri bu ideyaya necə yanaşır? Bunu aydınlaşdırmaq üçün klubların nümayəndələrinə müraciət etdik.

Əmrah Çəlikəl ("Qarabağ"ın icraçı direktoru): "Yaxın gələcəkdə belə planımız yoxdu".

Fərəc Əliyev ("Səbail"in icraçı direktoru): "Yaxın zamanda belə planımız yoxdu. Bəlkə gələcəkdə bu barədə düşünə bilərik".

Rüstəm Allahverdiyev ("Neftçi"nin mətbuat katibi): "Yaxın illərdə belə fikrimiz yoxdu".

Süleyman Tağıyev ("Turan Tovuz"un mətbuat katibi): "Bu çox gözəl ideyadı. İstəyərdik ki, futzalda da təmsilçimiz olsun. Amma hazırkı büdcəmiz buna imkan vermir. Gələcəkdə maliyyə imkanımız yaxşılaşan kimi futzal klubumuzu da yaradacağıq".

Elmar Abdullazadə ("Zirə"nin mətbuat katibi) : "Hazırda və yaxın gələcək üçün bu real deyil".

Rəşad Məmmədov ("Sumqayıt"ın mətbuat katibi): "2018-ci ildə “Sumqayıt”ın futzal məktəbi yaradılıb. Səhv etmirəmsə, elita təmsilçilərindən bunu ilk reallaşdıran biz olduq. Sonra pandemiya ilə bağlı məktəbimizin fəaliyyətini dondurduq. Hazırda yenidən fəaliyyət göstəririk. Akademiyamızın nəzdində çıxış edən gənc oyunçuların cəldlik və başqa funksiyalarının inkişafı üçün futzalda məşq etməsi önəmli addımlardan idi. Amma hazırda futzal komandası yaratmaq planımız yoxdu. Gələcəkdə isə bununla bağlı layihə, planlarımızın olacağı istisna deyil".

Nail Kərimov ("Qəbələ" Futbol Akademiyasının baş meneceri): "Hazırda və yaxın gələcəkdə belə planımız yoxdu".

Kamran İsmayılov ("Şamaxı"nın baş meneceri): "Biz Joze Alesionun çağırışından xeyli əvvəl futzal klubumuzu yaratmışıq. Hazırda 1-ci liqada Şamaxı şəhərinin eyniadlı komandası çıxış edir. Maraq üçün qeyd edim ki, “Şamaxı” keçirdiyi 9 oyundan sonra 24 xalla liderdi”.

Azad Mustafayev ("Kəpəz"in mətbuat katibi): "İndiki məqamda büdcəmiz yeni komanda, o cümlədən futzal klubu yaratmağa imkan vermir. Amma maliyyə imkanımız yaxşılaşarsa, "Kəpəz"in futzalda da çıxışını istəyərik".

Elnur Həmidov ("Sabah"ın mətbuat katibi): "Yaxın gələcəkdə klubun nəzdində futzal komandasının yaradılması nəzərdə tutulmayıb".

ABDULLA İSMAYILOĞLU