Yusuf Laval Portuqaliya “Aroka”sında tibbi müayinədən keçmək üçün bu ölkəyə yollanıb.

Football-plus.az xəbər verir ki, flaqman bu keçiddən pul qazanacaq. Portuqaliya təmsilçisi “ağ-qaralar”a təxminən 30-40 min avro ödəyəcək. Tərəflər yekun məbləğlə bağlı danışıqları davam etdirir. Böyük ehtimalla bu məsələ həftə ərzində həllini tapacaq. Laval Bakı klubunda 9 min dollar maaş alırdı. Flaqman nigeriyalı ilə uzun müddət danışıqlar aparıb. Lakin futbolçu yeni müqaviləyə razı olmayıb. Hətta ona aylıq 20 min dollara yaxın maaş təklif edilsə də, fikrindən dönməyib. O, “Neftçi”dən ayrılmaq fikrində qəti imiş. Bunun səbəbi yüksək maaş olmayıb. Belə ki, nigeriyalının yeni komandasında maaşı 12-13 min avro olacaq.

Görəsən, Laval nə üçün flaqmanı tərk edir? Əldə etdiyimiz bilgiyə görə, bunun səbəbkarı baş məşqçi Laurentsiu Regekampfdı. Rumıniyalı mütəxəssis onun xidmətində maraqlı deyil. Buna səbəb oyunçunun istənilən səviyyədə matçlara köklənə bilməməsidi. Bundan başqa, Yusufun ciddi çəki problemi var. Baş məşqçi dəfələrlə ona xəbərdarlıq edərək cəzalandırıb. Lakin nigeriyalı buna məhəl qoymayıb. Bundan əlavə, daha yaxşı çempionatda avrokuboklar uğrunda mübarizə aparan kollektivdə çıxış etmək şansını qaçırmaq istəməyib. Klub rəhbərliyi də Lavalın müqaviləsinin müddətinin başa çatmasını gözləməyərək satmaq istəyib ki, ondan xeyir götürsün. Regekampf isə sol cinaha vinger alınmasını tələb edib. Flaqman rəsmiləri artıq bu istiqamətdə axtarışa başlasa da, hələ ki heç kim tapılmayıb.

ABŞ-lı futbolçu Kenni Sayef də “Neftçi”ni tərk edə bilərmiş. Onunla 2-3 klub ciddi maraqlanıb. Lakin yarımmüdafiəçi Bakı təmsilçisində xoşbəxt olduğu üçün ayrılmaq istəməyib. Rəhbərlik də onun satılmasına razılıq verməyib.

İLKİN SULTANLI