Fasilə dönəmində “kimyaçılar”ın hələ ki “rənglərinə bağladığı” iki legionerdən biri Masaki Muratadı.

Football-plus.az xəbər verir ki, Latviya “Valmiera”sından gələn yarımmüdafiəçi ilə ilyarımlıq müqavilə bağlanıb. Yapon futbolçu ilə qısa müsahibəni sizə təqdim edirik.

- Çempionluq sevinci yaşadığın “Valmiera”nı “Sumqayıt”a dəyişdin. Müqavilə şərtləri yaxşıdı, yoxsa Azərbaycan çempionatının səviyyəsinin daha yüksək olduğunu düşünürsən?
- Özümü başqa ölkədə sınamaq istəyirdim. Azərbaycan çempionatı barədə eşitmişdim. Bu ölkənin çempionatında yaxşı komandalar var. Təklif alan kimi dəyərləndirdim və qəbul etdim. Burda özümü yaxşı tərəfdən göstərəcəyimə inanıram.

- Səndən əvvəl burda Keysuke Honda çıxış edib. Sən premyer-liqada oynayacaq ikinci, “Sumqayıt”ın tarixində isə ilk yapon futbolçusan. Yeni klubdan təklif gələndə kiminləsə məsləhətləşdin?
- Keysuke Honda Yaponiyanın ən güclü futbolçularından biridi. O bizim canlı əfsanəmiz, futbolumuzun rəmzlərindən sayılır. Möhtəşəm karyeraya sahibdi. Təklif alandan sonra əsasən ailəmlə məsləhətləşdim və qərarımı verdim. Azərbaycan futbol tarixində ikinci, “Sumqayıt”da isə ilk yaponiyalı futbolçu olduğum üçün xoşbəxtəm.

- Yeni klubunda səni necə qarşıladılar, kollektivə uyğunlaşa bilirsən?
- Burda peşəkar kollektiv var. Məni əla qarşıladılar. İnzibati personaldan tutmuş məşqçi və futbolçu heyəti yaxından maraqlanır, hər cür dəstək verir. Düşünürəm ki, uyğunlaşma ilə bağlı problem yaşamayacam. Gəldiyim ilk gündən isti münasibət görmüşəm. Özümdən gözləntilərim də çoxdu.

- Samir Abasov bir qədər sərt xarakterə malikdi. Komandanın məşqlərində bunu hiss edirsən?
- Yaxşı baş məşqçimiz var. Kənardan sərt görünə bilər, amma məşqlər zamanı tam fərqlidi. Onunla çalışmaqdan çox məmnunam.

- “Valmiera” ilə “Sumqayıt”ın fərqi?
- Bu qısa zaman kəsiyində fərqi anlada bilmərəm. Burda bir müddət olduqdan sonra nəsə deyə bilərəm. Amma “Valmiera” daha gənc komanda idi. Səhv etmirəmsə, orda 4-cü yaşlı futbolçu idim.

RƏŞAD