“Sumqayıt”da əsaslı dəyişiklik olmayacaq
Faiq Hacı-Məhərrəmov: “Büdcəni də nəzərə almaq lazımdı”
Mövsümə uğursuz başlayan “Sumqayıt” ilin son oyununda doğma azarkeşləri qarşısında biabır oldu.
Football-plus.az xəbər verir ki, son iki çempionat görüşündə qələbəyə həsrət qalan, çoxlarının eniş yaşadığını söylədiyi “Sabah” “Kapital Bank Arena”da “kimyaçılar”a əsl futbol dərsi keçdi. 0:6 hesablı acı məğlubiyyətdən sonra düşünmək olardı ki, “Sumqayıt”ın oyunçularından kimlərsə özündə cəsarət tapıb, heç olmasa, sosial şəbəklələr vasitəsiylə sumqayıtlılardan şəhərin adını biabır etdiklərinə görə üzr istəyəcək. Ancaq ötən cümə meydanı başıaşağı tərk edənlərin heç biri bu addımı atmadı və ya özünə sığışdırmadı. Belə yerdə atalar yaxşı deyib: “utanmasan, oynamağa nə var ki?”
Bəs görəsən, klub rəhbərliyi “Sabah” biabırçılığını necə qəbul etdi, fasilə dönəmində hansı addımları atmaq fikrindədi? İdman direktoru Faiq Hacı-Məhərrəmov 18-ci turda yaşanan biabırçılıqla bağlı bunları söylədi:
“Sabah”la matçdan əvvəl komanda 3 oyunda pis təsir bağışlamamışdı, 9 mümkün xaldan 7-ni toplamışdı. 4 tur öncə 5 xalla sonuncu pillədəydik və ağır durumdan necə çıxacağımız barədə düşünürdük. Son matçda qeydə alınan hesab hər şeyi deyir. Təəssüf ki, cümə günü bizdə heç nə alınmadı. “Sabah”da isə əksinə, həmin gün hər şey istədikləri kimi oldu. Acı məğlubiyyətdə kimisə fərdi şəkildə günahlandırmaq düzgün olmaz. Onsuz da çempionatın əvvəlindən bu günə kimi durumumuz hamıya bəllidi. Çalışırıq vəziyyətimizi düzəldək”.
İlk yarını bərbad keçirən komandada fasilə dönəmində, heç şübhəsiz, dəyişikliklər olacaq. Samir Abasov “Sabah”la matçdan sonra yeni oyunçuların yolunu gözlədiklərini bildirsə də, “qara siyahı”da neçə nəfərin olduğunu konkret demədi. Baş məşqçi vidalaşmaq istədiyi oyunçuların sayının yeni gələnlərdən asılı olacağını da vurğuladı. Yeri gəlmişkən, onu da xatırladaq ki, hələ ilk yarı başa çatmamış “Sumqayıt” Ture Oure-Nil və Damian Daniçiçlə yolları ayırıb. Almir Aqanspahiç, Rifat Nurmuqamet kimi legionerlər isə Abasovun gəlişindən sonra yaşıl meydana həsrət qalıb. Faiq bəy də bizimlə söhbətdə qış “transfer pəncərəsi”ndə komandada əsaslı dəyişiklik olmayacağının anonsunu verdi:
“Əsaslı dəyişiklik etmək istəsək belə, alınmaz. Bəlkə də bu kənardan asan görünür. Ancaq 25 futbolçudan 15-ni dəyişə bilməzsən. Onların hamısının müqaviləsi var. Büdcəni də nəzərə almaq lazımdı. Qış fasiləsində istədiyin futbolçunu transfer etmək çətin olur. Yeni gələn baş məşqçinin futbol fəlsəfəsinə, yeni mühitə uyğunlaşmalıdı. Bunlar hamısı isə vaxt aparan nüanslardı. Əsaslı dəyişiklik etməsək də, fasilə dönəmində hansısa addımlar atmağı düşünürük. Bəli, ilk yarı bitməmiş iki futbolçu ilə vidalaşdıq. Hər ikisini Aleksey Baqa bəyənib komandaya dəvət etmişdi. Ancaq Samir müəllim onları bəyənmədi. Hər məşqçinin futbola öz baxışı var. Onu da qeyd edim ki, gedənlər komandanın durumunu nəzərə aldığından büdcəyə o qədər də zərər dəymədi. Özləri də başa düşdü ki, yeni çalışdırıcı onlarla işləmək istəmir. Futbolda belə hallar qaçılmazdı”.
RƏŞAD
Digər xəbərlər
