Ötən həftə Region Liqasında növbəti turun oyunları keçirilib.

Football-plus.az xəbər verir ki, Mərkəz və Cənub regionunda artıq qış fasiləsi başlasa da, iştirakçı sayı çox olan Paytaxt və Şimal-Qərb regionunda komandalar meydana çıxıb. Onu da qeyd edək ki, Cənubda ötən həftə duman səbəbindən keçirilməyən bir qarşılaşma dekabrın 17-də baş tutub.

Cənub regionu

Dekabrın 11-də Lerikdə keçirilməli olan qarşılaşma qatı duman səbəbindən baş tutmamışdı. Bu səbəbdən bölgənin eyniadlı komandası ilə “Xəzər Lənkəran 42” arasında oyun ötən həftənin şənbə günü keçirilib. Geridə qalan turlarda özünü heç də pis tərəfdən göstərməyən liqanın debütantı ilin son oyununda çox çalışsa da, azarkeşlərini sevindirə bilməyib. Lerikdəki “Gənclik” stadionunda reallaşan görüş Lənkəran təmsilçisinin qələbəsi ilə yekunlaşıb. Qələbə sayəsində “Xəzər Lənkəran 42” xallarının sayını 10-a çatdırıb. Hazırda qrupda üçhakimiyyətlikdi. Sadəcə, top fərqinə görə “Qobustan” ilk pillədə qərarlaşıb.

Lerik – Xəzər Lənkəran 42 0:2
1. Qobustan 5 3 1 1 10-3 10
2. Xəzər Lənkəran 42 5 3 1 1 13-7 10
3. Lerik 5 3 1 1 10-5 10
4. Zəfər 44 5 1 3 1 9-7 6
5. Neftçala 5 1 2 2 5-7 5
6. Ərkivan 5 0 0 5 4-22 0

Bombardirlər: Zaur Nuruzadə (Lerik) – 4, Mirəli İsmayılov, Ümüd Hüseynov ( hər ikisi “Xəzər Lənkəran 42”), Arzuman Nəsibov (Qobustan) – 3.
Paytaxt regionu

Paytaxt regionunun A qrupunda iki görüş keçirilib. Geridə qalan turlarda xal itirməyən “Rekord” “Qusar”la matçda büdrəyib. Oyun qonaqların minimalhesablı qələbəsi ilə yekunlaşıb. Qusarın digər təmsilçisi “Şirvanovka” üçün də həftəsonu ürəkaçan olub. “Gəncliy”in qonağı olan “Şirvanovka” meydan sahiblərini 5 cavabsız qolla üstələyib. “Bakı Atletik” isə ardıcıl ikinci matçda da meydana çıxmayıb. 4-cü turda Şirvanovkaya getməyən komanda bu dəfə “Dirçəliş”lə qarşılaşmada eyni addımı atıb. Böyük ehtimalla “Bakı Atletik” yarışdan kənarlaşdırlacaq. 5 turdan sonra turnir cədvəlinə “Qusar” başçılıq edir. 1 xal geri qalan “Rekord” ikinci, “Şirvanovka” isə üçünçü pillədə qərarlaşıb.

A qrupu
Rekord – Qusar 0:1
Gənclik – Şirvanovka 0:5
Bakı Atletik – Dirçəliş (oyun keçirilməyib)

1. Qusar 5 4 1 0 25-2 13
2. Rekord 5 4 0 1 20-1 12
3. Şirvanovka 6 3 2 1 11-2 11
4. Gənclik 5 2 0 3 5 20 6
5. Dirçəliş 4 1 1 2 6-9 4
6. Mübariz 5 1 0 4 15-21 3
7. Bakı Atletik 4 0 0 4 2-29 0

Bombardirlər: Sərxan Ağayev (Qusar) – 12, Cəfər Şahmuradov (Mübariz) – 10.

B qrupu

Həftə qonaqlar üçün düşərli olub. Hər üç görüşdə meydan sahibləri məyus olub. “Cəbrayıl” “Lokomotiv”i, “İrəvan” “Cürət”i, “Çinar-Zəngilan” isə İCBFA-nı “ağ bayraq qaldırmağa” məcbur edib. 5 turdan sonra turnir cədvəlində ikihakimiyyətlikdi. “Difai” və “Çinar-Zəngilan” hərəyə 15 xal toplasa da, ikincilər top fərqinə görə liderdi.

Lokomotiv – Cəbrayıl 3:6
Cürət – İrəvan 3:4
İCBFA – Çinar-Zəngilan 1:3
1. Çinar-Zəngilan 6 5 0 1 34-5 15

2. Difai 5 5 0 0 31-7 15
3. Cəbrayıl 5 2 1 2 17-14 7
4. İCBFA 5 1 1 3 8-15 4
5. Lokomotiv 4 1 0 3 10-19 3
6. İrəvan 4 1 0 3 6-34 3
7. Cürət 5 1 0 4 15-27 3

Bombardirlər: Eşqin Tağıyev (Difai) – 11, Sergey Markelov (Çinar-Zəngilan) - 10.

Şimal-Qərb regionu
Həftəsonu Şimal-Qərb regionunda bütün diqqətlər “Karvan” – “Marxal” görüşünə yönəlmidi. Şəki təmilçisi Yevlaxa qrupun lideri kimi gəlmişdi ki, bu da mübarizəyə əlavə rəng qatırdı. Matç qonaqlar üçün yaxşı start götürüb və onlar hesabı açıb. Buna qədər isə şəkililər iki oyunçusunu itirib. Onlardan biri hətta xəstəxanalıq olub. Lakin referi yevlaxlıların futbolçularına vərəqə göstərməyib. "Karvan"ın hesabı bərabərləşdirməsinə səbəb olan penalti epizodu da qonaqları narazı salıb. Qayda pozuntusunun cərimə meydançasından kənarda olduğunu əsas gətirən şəkililər hakimə iradlarını bildirsə də, qərar dəyişməyib. Ən yaddaqalan hadisə isə görüşün sonlarında yaşanıb. "Karvan" 83-cü dəqiqədə ikinci qolu vurandan sonra meydana azarkeşlər daxil olub. Onlar qonaqların ünvanına təhqiramiz ifadələr səsləndirib. Stadionda olan polislər isə fanatların qarşısını almayıb. Başverənlərə etiraz edən "Marxal”ın məşqçilər korpusu futbolçuları meydandan çıxarıb. Şəkililər bu addımı atınca, matçın başa çatmasına 7 dəqiqə qalmasına baxmayaraq, baş hakim Sərxan İsmayılov final fitini səsləndirib. Bir neçə dəqiqədən sonra oyunun qaldığı yerdən davam etməsini istəyən Şəki komandasının tələbi nəticəsiz qalıb və qarşılaşma 2:1 hesabı ilə yekunlaşıb. Digər görüşlərə gəlincə, “Qala” ardıcıl 3-cü oyununu da qələbə ilə başa vurub. Şəmkirlilər bu dəfə “Göyəzən”i böyük hesabla məğlub edib. “VT Gəncə” də qrupun autsayderi “Şəki “üzərində böyükhesablı qələbəyə sevinib. “Göygöl” isə “Ağstafa”dan üstün olub. 6 turdan sonra “Karvan” hamıdan irəlidədi. 5 tur lider kürsüsündə əyləşən “Marxal” isə Yevlaxdakı matçdan sonra ikinci pillədə qərarlaşıb. İlk “üçlüy”ü 10 xalla “Ağstafa” qapayır.

Göygöl – Ağstafa 4:3
Karvan – Marxal 2:1
VT Gəncə - Şəki 10:1
Qala (Şəmkir) – Gözəyəzən (Qazax) 6:1

1. Karvan 6 5 1 0 12-2 16
2. Marxal 6 5 0 1 28-4 15
3. Ağstafa 6 3 1 2 24-19 10
4. Qala 6 3 1 2 12-8 10
5. Göygöl 6 2 1 3 14-12 7
6. Göyəzən 6 2 1 3 17-21 7
7. VT Gəncə 6 1 1 4 19-18 4
8. Şəki 6 0 0 6 5-47 0

Bombardirlər: Ceyhun Rəcəbli (Marxal) – 11, Arzuman Vəliyev (Göyəzən), Ravil Yusifli (Marxal) – 9.

RƏŞAD