Bilindiyi kimi, Türkiyə çempionatında DÇ-2022 ilə bağlı yaranmış fasilədən əvvəl keçirilən son turda “İstanbul BŞ” öz meydanında fiaskoya uğrayaraq “Qalatasaray” önündə 0:7 hesabı ilə darmadağın olmuşdu.

Bu nəticə Türkiyə futbol ictimaiyyətini şoka salmışdı. Çünki Əmrə Belözoğlunun çalışdırdığı kollektiv həmin tura ən az qol buraxan komanda statusunda daxil olmuşdu. Ümumiyyətlə, “İstanbul BŞ” tarixi ərzində heç vaxt elitada bir oyuna 7 top buraxmamışdı. Oyundan sonra əsəbdən və üzüntüdən özünə yer tapa bilməyən Əmrə “Qalatasaray”a bizə səviyyəmizi göstərdiyi üçün təşəkkür edirəm” açıqlamasını vermişdi. Hiss olunurdu ki, bu biabırçılığa görə bəzi oyunçularla bağlı radikal addımlar atılacaq. Belə də oldu. “İstanbul BŞ”nin təcrübəli sol cinah müdafiəçisi Hasan Əli Kaldırımla yollarını ayırdığı məlum olub. Kaldırım həmin görüşdə 90 dəqiqə meydanda olmuşdu. Daha öncə 8 mövsüm “Fənərbaxça”nın şərəfini qorumuş və 2020-dən “İstanbul BŞ”də çıxış edən 33 yaşlı futbolçu komanda ilə birlikdə Antalya toplanışına yollanmamışdı. Onun zədəli olduğu güman edilsə də, reallıq başqa cür imiş. Kaldırımın “İstanbul BŞ” karyerası 63-cü oyundan sonra başa çatdı (3 qol, 1 məhsuldar ötürmə). Bundan başqa, Əmrənin qərarı ilə 36 yaşlı mərkəz müdafiəçisi Aleksandru Yepuryanu əsas komandadan kənarlaşdırılıb və ikinci bir qərara qədər fərdi şəkildə məşq edəcək. Moldovalı futbolçu İstanbul təmsilçisində 9-cu mövsümünü keçirir. “İstanbul BŞ”nin elitaya qayıtdığı və indiki adla çıxış etməyə başladığı 2014-cü ildən etibarən o komandadadı.

Bu arada “Fatih Karagümrük”dən ayrılandan sonra hələ də özünə yeni klub tapa bilməyən və azad agent statusunda olan Canər Ərkinə maraq göstərənlərin sırasına “İstanbul BŞ” də qoşulub. Əmrə Belözoğlu Hasan Əli Kaldırımın yerinə məhz Canərin transfer olunmasını istəyir. Amma 34 yaşlı oyunçunun müştərisi çoxdu. Ona “Beşiktaş”la “Qalatasaray” da maraq göstərir. Canər özü sabiq klubu “Beşiktaş”a qayıtmaq arzusundadı. Amma onlar arasında danışıqların olub-olmadığı bəlli deyil. “Beşiktaş” variantı alınmayacağı halda, Canər böyük ehtimalla “İstanbul BŞ”yə yollanacaq.

Qeyd edək ki, Canər hazırda 6 məhsuldar ötürmə ilə superliqada assistentlər yarışına başçılıq edir. Klubsuz qalan Hasan Əli Kaldırıma gəlincə, ona “Adana Dəmirspor” maraq göstərir.