“Alyans” çempionatda çıxışını dayandırmayacaq
“Alyans” futzal üzrə yüksək liqanın 10-cu turunda “Baku Fire” ilə qarşılaşmalı idi. Lakin komanda bu oyuna çıxmadı.
Football-plus.az xəbər verir ki, Lənkəran təmsilçisinin 9-cu turda U-19 ilə görüşü isə yarımçıq dayandırlmışdı. Buna “Alyans”ın meydandan qovulan qapıçını ikinci qapıçı ilə əvəzləyə bilməməsi səbəb olmuşdu. Belə ki, heyətdə ikinci qapıçı yer almayıb. 10 oyunun 9-da uduzan komanda son pillədə qərarlaşıb. Özü də görüşlərin çoxunda böyük hesab qeydə alınıb.
Komandanın bu vəziyyətə düşməsinin səbəbi maraqlıdı. Bunu aydınlaşdırmaq üçün “Alyans”ın direktoru Məhəmməd Hüseynovla əlaqə saxladıq: “Mən bu barədə mediaya açıqlama vermişdim. Komandada oyunçuların əksəriyyəti zədəli idi. Qapıçımız da son oyunda qırmızı vərəqə almışdı. Ehtiyatda da qapıçımız yox idi. Bu səbəbdən həmin oyunu buraxmaq məcburiyyətində qaldıq. Yəni imtina etməyimizin səbəbi oyunçularımızın sıradan çıxması oldu. Onlardan 3-ü əməliyyat olunub. Birinin vəziyyəti isə nisbətən yaxşıdı. Həmin futzalçılar üçün artıq mövsüm başa çatıb. Komandanın oyuna çıxmamasının və zəif çıxış etməsinin səbəbi budu. İlk iki görüşdə ümumilikdə 4 nəfər zədələndi. “Transfer pəncərəsi” bağlı olduğuna görə yeni oyunçu cəlb edə bilmədik. İnşallah, yanvarın 5-də “pəncərə” açılacaq. O zaman komandaya 13 yox, 16-17 oyunçu cəlb etmək istəyirik ki, vəziyyəti düzəldək. Bu istiqamətdə də işlər gedir. Artıq oyunçularla danışmışıq, heyəti gücləndirəcəyik. Biz ikinci ildi oynayırıq. Təcrübəsizlikdən bu problemlərin öhdəsindən gələ bilmədik. İnşallah, fasilədən sonra güclü heyətlə çıxış edəcəyik”.
ŞAİR ABDULLA
Digər xəbərlər
