"Neftçi" loqosunda dəyişiklik edəcək
Peşəkar Futbol Liqası müsabiqə nəticəsində yeni loqosuna qovuşdu.
130 nümunə arasından Fərhad Sultanovun hazırladığı loqo bəyənildi. Ona nəzərdə tutulan 2 min manat mükafat da təqdim olundu. Fərhad bəy qəzetimizə açıqlamasında premyer-liqa təmsilçilərinin 90 faizinin loqosunu dəyişilməli, rebrendinqə ehtiyacı olduğunu söyləmişdi. Dizaynerin fikrincə, loqolar köhnəlib və yenilənməyə ehtiyac var. Onun bu sözlərinə münasibət öyrənmək üçün elita klublarının rəsmilərinə müraciət etdik.
Elnur Həmidov (Sabah):
"Klubumuzun loqosu peşəkar dizayner tərəfindən hazırlanıb. Loqo və başqa atributlar ilə bağlı klubumuzun "brendbuk"u var. Loqodan və başqa rəmzlərdən məhz bu "brendbuk"da göstərilən qaydada istifadə edilir. Düzdü, bəzən başqa klubların paylaşımlarında klubumuzun loqosundan düzgün olmayan şəkildə istifadəyə rast gəlinir. Lakin bununla bağlı müraciət olunandan sonra müvafiq düzəliş edilir. Loqonun dəyişdirilməsi və ya rebrendinqlə bağlı hələ ki hansısa plan yoxdu. Gələcəkdə dəyişiklik nəzərdə tutulsa, bu barədə ictimaiyyətə məlumat veriləcək".
Anar Hacıyev (Qəbələ):
"Düşünürəm ki, Fərhad bəy bizi nəzərdə tutmayıb. Çünki biz loqomuzdan və onun standartlarından razıyıq. Təbii ki, istənilən klubun loqosu zamanla rebrendinqə ehtiyac duyur. Amma bizim loqomuzun hazırda heç bir rebrendinqə ehtiyacı yoxdu".
Rəşad Məmmədov (Sumqayıt):
"Sumqayıt" 2011/12 mövsümündən elitada çıxış edir. Son dəfə loqomuzu 2019-cu ilin yayında rebrendinq etmişik. Daha müasir görünüşə malikdi, standartlara tam cavab verir. Onu da xüsusi vurğulayım ki, sonuncu dəfə klublarımızdan "Şamaxı"loqosunu rebrendinq etdi. Onlardan əvvəl isə biz yeniləmişik. Odu ki, loqomuzdan çox məmnunuq".
Elmar Abdullazadə (Zirə):
"Hazırda loqomuzun dəyişməsi, rebrendinqi gündəmdə deyil. Zamanla buna ehtiyac duyularsa, mətbuata xəbər verəcəyik".
Süleyman Tağıyev (Turan Tovuz):
"Loqomuzla bağlı heç bir narazılığımız yoxdu. Ona görə də dəyişikliyə və rebrendinqə ehtiyac görmürük".
Sənəm Fərhadova (Səbail):
“Loqomuzdan razıyıq və dəyişiklik haqda düşünmürük".
Azad Mustafayev (Kəpəz):
"Fərhad Sultanov fikir bildirib. Bu da onun haqqıdı. Amma onun fikri özünə aiddi. "Kəpəz" tarixi, ənənəsi olan xalq komandasıdı. Ona görə də klubumuzun loqosu bir-iki nəfərin iradəsiylə dəyişdirilə bilməz. "Kəpəz"in loqosu vaxtilə "Futbol+" qəzetində çalışan, hazırda isə ABŞ-da yaşayan və dizaynerlik fəaliyyətiylə məşğul olan Röyal Paşayev tərəfindən hazırlanmışdı. Loqomuzdan da çox məmnunuq. Təbii ki, zamanla bir çox şeylər yeniləndiyi kimi, ehtiyac duyulsa, biz də dəyişiklik edəcəyik".
Rüstəm Allahverdiyev (Neftçi):
"Yaxın gələcəkdə loqomuzla bağlı dəyişiklik etməyi düşünürük. Çünki artıq standartlara cavab vermir. Bu yöndə müəyyən işlər görülsə də, hələ ki fəal çalışmırıq".
ABDULLA İSMAYILOĞLU
Digər xəbərlər
