Hakim Cavid Hüseynova hansı sözünə görə qırmızı vərəqə verib? - AÇIQLAMA
Ölkə kubokunun 1/8 finalında baş tutan "Şamaxı" - "Turan Tovuz" oyununda "aslanlar"ın məşqçisi Cavid Hüseynovun hakimlərə çılğın şəkildə etirazı, əl-qol atması və qırmışı vərəqlə alması diqqəti çəkdi. AFFA İntizam Komitəsi isə onu 6 oyun cəzalandırdı, klubu 4800 manat cərimələdi.
Görəsən, "Şamaxı" apellyasiya şikayəti verəcək? "Football-plus.az" saytı olaraq bu sualla klubun mətbuat katibi Yusif Hüseynova müraciət etdik: "Cavid müəllim qırmızı vərəqə alması və 6 oyunluq cəzayla bağlı mətbuata açıqlama verib. Əlavə olaraq qeyd edim ki, Cavid müəllim hakimə nə nalayiq sözlər deyib, nə də əl-qoluyla zərbə vurub. Hakimin futbolçumuzu qayda pozuntusuna görə cəzalandırmasına reaksiya verdi. Yaxınlaşıb dedi ki, "rəqib futbolçular da oyunun gedişində eyni hərəkəti 3 dəfə etsə də, onlara rəsmi xəbərdarlıq etmədin". Bundan sonra hakim sarı vərəqə göstərdi. Cavid müəllim bir qədər emosianal şəkildə etiraz etsə də, təhqirə yol vermədi. Hakim əlini cibinə atarkən, qırmızı vərəqə verməməsi üçün ona müdaxilə etmək istədi. Yoxsa onun hakimə əl qaldırmaq, vurmaq niyyəti yox idi. Cəzası da açıqlanıb. Apellyasiya şikayəti verib-verməyəcəyimiz dəqiq deyil"
ABDULLA İSMAYILOĞLU
