Polşa Tennis Federasiyasının prezidenti Miroslav Skşipçinski seksual qısnamada ittiham olunur.
Uşaq vaxtı tennislə məşğul olan xalq deputatı Katerjina Kotula onun davranışı haqda danışıb:
“Skşipçinski Polşanın ən yaxşı məşqçisi sayılırdı. Bizim klubda belə hesab edirdilər ki, onun rəhbərliyi altında çalışmaq böyük şərəfdi. Məşq vaxtı inanılmaz hərəkətlər edirdi: qızların döşünü və dalını sığallayır, oğlanlardan soruşurdu ki, bizə toxunmaq istəyirlərmi? Və bir sevimli sözü var idi: “Qadın “yox” deyirsə, bu “hə” deməkdi”. Sonra o fiziki təmas üçün imkanlar axtarır, qızları tez-tez ofisinə dəvət edirdi. Orda mənim intim yerlərimə toxunub, dəfələrlə zorlayıb. Niyə heç nə etməmişəm? Düşünürəm ki, bu, yalnız uşaq utancaqlığı ilə bağlı idi. İndi isə o, tennisdə vacib şəxsdi və hətta idman naziri olmaq istəyir”.
Ölkənin ən tanınan qadın və kişi tennisçiləri – İqa Sventek ilə Hubert Hurkaç da bu məsələ ilə bağlı birgə bəyanat yayıb:
“İdmanda, tenisdə, istənilən başqa növdə və gündəlik həyatda zorakılığın əleyhinəyik. Bu üzdən Polşa Tennis Federasiyasının prezidenti ilə bağlı xəbərləri ciddi məsələ kimi qəbul edirik. Rəhbər orqanlar bu məsələni tezliklə araşdırmalıdı”.
Kotulanın ardından başqa sabiq tennisçilər, Skşipçinski ilə yolları kəsişən qadınlar da oxşar xarakterli açıqlamalar verib. Belədə prezident istefaya getməli olub. Yerli tennis qurumu isə sabiq prezidentin ünvanına yönələn ittihamları araşdırmaq üçün komissiya yaradıb.