İki aya yaxındı qonşu İran çalxalanır.

Kürd qızı Məhsa Əmininin hicab qaydasını pozduğuna görə öldürülməsi ilə başlayan xalq etirazları geniş vüsət alıb. İranda yaşayan ən müxtəlif xalqlar artıq bu şəraitdə, qadağa və sanksiyalar mühitində yaşamaqdan bezib. Fars-molla rejimi çoxdan ölkənin qapılarını dünya üçün qapayıb, adi insani hüquqlar uğrunda mübarizə aparan istənilən şəxsi əzməyə, edam etməyə qadirdi. Təbii ki, sayı 35-40 milyona çatan Güney Azərbaycan türkləri də haqları ən kobud şəkildə pozulan xalqlar arasındadı. Görün vəziyyət nə yerə çatıb ki, İran yığmasının azərbaycanlı bombardiri Əli Daei də dözə bilməyib, xalqın tərəfinə keçib, sərt idarəçiliyə etirazını bildirib. Srağagün “teleqram” kanallarında yayılan xəbərlərdən biri Daeinin taleyi ilə bağlı idi. Guya teokratik rejim 15 etirazçı ilə bağlı ölüm hökmü çıxarıb. Nə qədər qəribə səslənsə də, Əlinin də adı edam olunacaq adamlar sırasında çəkilir. Elə burdaca bir haşiyə çıxmaq istəyirəm.

İran – Azərbaycan münasibətlərində gərginliyin son günlər ən yüksək səviyyəyə çatması heç kimə sirr deyil. Bunun səbəbi də hər kəsə aydındı. İran 44 günlük müharibədəki əzici qələbəmizi, daha doğrusu, regiondakı, bəlkə də dünyadakı ən yaxın dostu Ermənistanın biabırçı məğlubiyyətini həzm edə bilmir. Gah Azərbaycanın sionistlərin təsir dairəsində olduğunu deyir, gah Don Kixot yel dəyirmanı ilə savaşan kimi xəyali qırmızı xətt cızaraq, onun üzərindən o tərəf – bu tərəfə tullanır. Bu elə əcaib ölkədi ki, Azərbaycan səfiri Əli Əlizadəni “Təbrizin gecələri də gözəldi” paylaşımına görə məhşər ayağına çəkməyə hazırdı. Əslində fars rejiminin canına qorxu salan nəsnələr çoxdu. O qədər ağılsız deyillər, çox gözəl anlayırlar ki, qələbənin dadını hiss edən 35-40 milyon türk bir gün hüquqları uğrunda mübarizəyə qalxacaq, bizi “parçalanmış xalq” statusu ilə barışmağa məcbur edən iki imperiyadan hesab soracaq. Odu ki, hadisələri qabaqlamağa, mümkün inqilabı beşikdə boğmağa, soydaşlarımın gözünü qorxutmağa çalışırlar. Ancaq cin şüşədən çıxıb. Prezident İlham Əliyevin Səmərqənddə dediyi fikirlər – “təəssüf ki, Azərbaycan dövlətinin hüdudlarından kənarda yaşayan 40 milyon azərbaycanlının əksəriyyəti ana dilində təhsil almaq imkanından məhrumdu” - mollakratiya üçün həyəcan siqnalı olmalı, hakim rejim ən azı azərbaycanlılara münasibətdə hərəkətlərinə çəki-düzən verməlidi. Amma nə görürük? Necə həyasızlaşıblarsa, nəinki İran, hətta dünya futbolunun ulduzlarından olan Daeinin edamına qərar veriblər. Çox ümid edirəm ki, bu, sadəcə, “teleqram” kanalları üçün xarakterik olan saxta xəbərdi. Bu məsələnin gündəmə gətirilməsi belə İran hakimiyyətini sarsıda, İran, sadəcə, viran ola bilər. Hələ mən belə dünyaca məşhur adamın edam olunmasının doğuracağı beynəlxalq reaksiyaya toxunmuram. Yalnız öz məhvinə, intiharına qərar verən bir rejim belə alçaq, heç bir insanlıq-mənəviyyat çərçivəsinə sığmayan hərəkətə əl ata bilər. Onda güneyli-quzeyli bütün Azərbaycan türkləri fars-molla rejimi əleyhinə elə bir hərəkata başlayar ki, daşlar yerindən oynar, Güney Azərbaycan türklərinin bütün indiyəqədərki hərəkatları yalan olar. Kəsəsi, fars, sən Əlini edam edə bilməzsən!

HUŞƏNG