Azərbaycanda yaşayırsansa, ikili standartlara alışmalısan.

Yox, vətənimi pisləmirəm. Dünyanın ən gözəl diyarıdı buralar. Amma fərqli dövrlərin insanlarının bir yerə yığılması cəmiyyətin normal formalaşmamasına səbəb olub. Kimsə SSRİ-nin qayıtmasını istəyir, kimsə türkçülük sevdasındadı, bəziləri də molla rejiminin tərəfdarıdı. Bu da cəmiyyətimizə fayda vermir.

Futbolumuzda da bu hal özünü göstərir. Məsələn, Hakimlər Komitəsinin işində. Bu qurum üçün konkret qanun-qayda yoxdu, rəhbərlərinin iradəsi var. Ötən ilin sonunda "ilin futbolçusu" seçimində hakimlərə və hakim-inspektorlara müraciət etdik, seçimlərini öyrəndik. Hər biri böyük məmnunluqla cavab verdilər. Amma bir gün sonra dedilər ki, Frits Stuxlik belə rəy sorğularına qatılmağı qadağan edib, hakimlər, seçkidə iştirak edə, oyunla bağlı fikir söyləyə bilməzlər. Təbii ki, biz bu iradı nəzərə almadıq, ona görə ki, başdan-ayağa absurd idi.

Hamı bilir ki, komandalarımızın avrokubok matçlarına təyinat alan hakimlərin idarəçiliyini şərh etməsi üçün ekspertlərə müraciət edirik. Vallah, çətinlik çəkirik. Elə ancaq Tahir Süleymanovla Əfqan Həmzəyevə əlimiz çatır. Sağ olsunlar. Başqaları deyir ki, hakim-inspektor kimi oyunlara təyinat alırıq. UEFA-nın keçirdiyi görüşlərə təyinat alan referiləri müzakirə edə bilmərik, kakimliklə bağlı məcəlləyə ziddi. Yaxşı. Biz jurnalist olaraq deyiləni edirik. Hakimliklə bağlı nəsə olanda həm AFFA-dan, həm də komitədən icazə alırıq. Yəni qaydalara hörmət edirik.

Qısaca belə sual verim. Hakimlərin davranışını tənzimləyən məcəllə varsa, Əliyar Ağayev nə üçün telekanalların birində Çempionlar Liqasında idarə etdiyi oyun haqda danışır? Təbii ki, onun uğuru bizi sevindirir. Amma bu məsələdə niyə ikili standart tətbiq olunur? Məhz məcəlləyə görə Barış Şimşək Əliyarın oyununu şərh etmirsə, onda hakim özü niyə efirə çıxıb fikir bildirir? Jurnalistin işi soruşmaq və öyrənməkdi. "Futbol+" qəzeti olaraq, bu ayrı-seçkiliyin və absurd durumun izahını AFFA Hakimlər Komitəsindən gözləyirik. Hakim danışa bilər, ya yox?

İLKİN SULTANLI