''Atletik''in forvardı İnyaki Uilyams futbolda nadir görünən seriyasını davam etdirərək yeni rekordların müəllifi olmaqdadı.

"Football-plus.az" xəbər verir ki, 28 yaşlı qanalı futbolçu uzun müddətdi zədə almaması və ardıcıl olaraq ''Atletik''in bütün oyunlarında iştirak etməsi ilə tanınır. Uilyams sonuncu dəfə İspaniya çempionatında 2015/16 mövsümündə, daha dəqiq desək 2016-nın aprelində oyun qaçırıb! Ötən ilin oktyabrın əvvəllərində əvvəllərində o, La Liqada ardıcıl 202-ci oyununu keçirərək adını turnirin tarixinə yazdırmışdı. Dünən bu unikal futbolçu daha bir rekord müəyyənləşdirdi.

Uilyams ''Atletik''in 13-cü tur çərçivəsində səfərdə ''Jirona'' ilə keçirdiyi oyunda iştirak etməklə La Liqada ardıcıl 246-cı qarşılaşmaya çıxdı! Bununla da o, ''böyük beşlik''də sahə oyunçuları arasında bu göstəricidə rekordsmen olan Manfred Bintsə çatdı. Bu futbolçu 1987-94-cü illərdə Frankfurt ''Ayntraxt''ının heyətində bundesliqada ardıcıl 246 qarşılaşmada forma geymişdi. Dünyada qeyri-adi bir hadisə baş verməsə, Uilyams həftəiçi keçiriləcək növbəti turda bu rekordun təkbaşına yeni sahibi olacaq. Xatırladaq ki, Bask bölgəsinə köçmüş qanalı bir ailədə doğulan Uilyams 18 yaşından ''Atletik''in şərəfini qoruyur.