“Qalatasaray”ın “Alanyaspor”a qarşı keçirdiyi başıbəlalı qarşılaşmanın üstündən artıq 10 gün ötsə də, bu oyun hələ də müzakirə olunur.

Football-plus.az xəbər verir ki, oyun oktyabrın 23-də superliqanın 11-ci turu çərçivəsində “Nef Stadionu”nda keçirilmişdi. “Cim-Bom” erkən qollarla 2 topluq üstünlük yaxalamış, amma 31-ci dəqiqədə azlıqda qalandan sonra üstünlüyü əldən vermişdi. 2:2 hesabı ilə bitən oyunu meydan sahibləri 9 futbolçu ilə tamamlamaq məcburiyyətində qalmışdı. O matçda Əli Palabıyıkın idarəçiliyi ”sarı-qırmızılar”da çox böyük narazılıq doğurmuşdu. Bu hakim avrokuboklara təyinat almaqda davam etsə də, superliqada hələ uzun müddət oyun idarə etməyəcəyi gözlənilir. Bu arada dünən həmin qarşılaşma ilə bağlı yeni bir sürpriz yaşandı. Belə ki, “Qalatasaray” o matçda 65-ci dəqiqədə oyun qaydalarının pozulduğunu iddia edərək Türkiyə Futbol Federasiyasına rəsmi məktub ünvanladı.

“Aslan” həmin andan etibarən oyunun qalan hissəsinin yenidən keçirilməsini tələb edir! Həmin vaxt isə Okan Burukun komandası 2:0 hesabı ilə öndə idi. Bəs 65-ci dəqiqədə nə baş verib? Sən demə, “Alanyaspor” hücumda olarkən meydana ikinci top atılıb. Yan xətt hakimi Ərdəm Bayık isə hücum yarımçıq qalmasın deyə meydanın içinə daxil olaraq topu kənara vurub. Bu epizod meydanın digər tərəfində, yəni topsuz olan hissədə baş verib. Düzdü, yan xətt hakiminin əsas iş-gücünü atıb ikinici topu kənarlaşdırması futbolda nadir hallarda görünən olaydı. Amma bunun oyun qaydalarının pozulması kimi qiymətləndiriləcəyi inandırıcı görünmür. Həm də bu olayı sabiq hakim Dəniz Çoban köşə yazısında gündəmə gətirənə qədər heç kim ona fikir verməmişdi. Qaydalara görə belə olaylarda klubun şikayət etmək üçün 72 saat vaxtı olur. Yəni “Qalatasaray”ın narazılığı var idisə də, bunu ən gec oktyabrın 26-na qədər bildirməliydi. Ona görə də komandanın istəyinə çatacağı inandırıcı görünmür. Amma Türkiyə futbolunda meydana atılan ikinci top üzündən oyunun yenidən keçirilməsi olayına artıq rast gəlinib! Bu hadisə 2013-cü ilin dekabrında - “Kasımpaşa” – “Beşiktaş” matçında baş vermişdi. O vaxt “Kasımpaşa”nın şərəfini qoruyan Rayan Donk meydana atılan ikinci topu əlinə götürərək hücum edən “Beşiktaş”lı Uqo Almeydanın ayağında olan topun üstünə atmışdı. Bununla da hücuma mane olmuşdu. “Beşiktaş” 1:2 hesabı ilə uduzduğu matçın ardından bu epizoda görə federasiyaya müraciət etmiş və istəyinə çatmışdı. “Qartal” yenidən keçirilən matçda 3:0 hesabıyla qalib gəlmişdi.

Yeri gəlmişkən, “Qalatasaray” – “Alanyaspor” matçında qırmızı vərəqə alan Əbdülkərim Bardakçı ilə bağlı yeni xəbər var. Bilindiyi kimi, Nizam-İntizam Komitəsi müdafiəçiyə 2 oyunluq cəza versə də, “Qalatasaray” buna etiraz etmişdi. İstanbul nəhənginin apellyasiyası bəhrəsini verib. Apellyasiya Komitəsi Əbdülkərimin 2 oyunluq cəzasını 1 oyuna endirib! Bu da o deməkdi ki, həmin 1 oyunluq cəzanı artıq çəkən 28 yaşlı futbolçu həftəsonu “Beşiktaş”a qarşı keçiriləcək derbidə meydanda olacaq.