Son 20 ildə futbola damğa vuran və bir çox göstəricidə sanki futbolun tarixini yeniləyən Kriştiano Ronaldo bəlkə də peşəkar karyerasının ən çətin dönəmini yaşayır. Alışmadığı ehtiyat oyunçu statusu ilə heç cür barışa bilməyən əfsanə gündən-günə həm özünü, həm də nailiyyətlərini gözdən salır.

Bir hərəkəti ilə yenə gündəm oldu

Premyer-liqanın son turunda ''Mançester Yunayted'' ''Tottenhem'' ə qarşı ev matçında bəlkə də Erik ten Haqın dönəmində ən yaxşı oyununu keçirərək 2:0 hesablı inamlı qələbə qazandı. Amma növbəti gün futbol ictimaiyyəti komandanın qələbəsini yox, həmin matçda, ümumiyyətlə, meydana çıxmayan Kriştiano Ronaldonu müzakirə etməyə başladı! Çünki oyunda dəqiqələr 89:24-ü göstərərkən portuqaliyalı superulduz ehtiyat oyunçular skamyasından qalxaraq üzgün şəkildə dəhlizə tərəf yollandı. Ten Haq oyunsonrası mətbuat konfransında ''onu gördüm, amma söhbət etmədik. Bu məsələ ilə sabah məşğul olacam. Çünki bu gün qələbəni qeyd edirik'' sözləri ilə reaksiya bildirdi. Ertəsi gün həqiqətən də klub Kriştiano ilə bağlı mühüm qərar verdi. Əvvəlcə onun şənbə günü ''Çelsi'' ilə keçiriləcək oyunda iştirak etməyəcəyi açıqlandı. ''Atletik'' nəşri isə Ronaldonun bir müddət komandadan ayrı, yəni fərdi şəkildə məşq edəcəyini bildirir.

Meydana çıxmaqdan imtina etdi!

Belə güman olunur ki, Ronaldonun bu cür addım atmasının və final fiti səslənmədən arenanı tərk etməsinin əsas səbəbi onu sona qədər də meydana buraxmayan Ten Haqdan inciməsidi. Amma digər tərəfdən, ''Deyli Meyl'' və ''Atletik''in iddiasına görə, niderlandlı mütəxəssis bu olaydan cəmi 3 dəqiqə öncə, yəni 87-ci dəqiqədə futbolçunu meydana buraxmaq istəyirdi. Sadəcə, Ronaldo həmin an meydana çıxmaqdan imtina etdi. Bu faktı dünən İngiltərə mətbuatına açıqlamasında Ten Haq da təsdiqlədi. Hətta şayiələrə inansaq, Kriştiano qələbəni komanda yoldaşları ilə qeyd etməyərək oyun bitmədən stadiondan ayrılıb! Bu da yetərincə real görünür. Çünki Ronaldo 2 ay əvvəl də oxşar hərəkətlə gündəmə gəlmişdi. Avqustda ''Old Trafford''da ''Rayo Valyekano'' ilə yoxlama oyununun fasiləsində əvəzlənən məşhur futbolçu daha sonra oyun bitmədən stadionu tərk etmişdi. Ten Haqın həmin vaxt reaksiyası belə olmuşdu: ''Bu hərəkət qəbuledilməzdi. Biz komandayıq. Ona görə də sona qədər bir yerdə olmalıyıq''. Son addımına görə Kriştianoya klub tərəfindən pul cəzası verilib-verilmədiyi barədə məlumat yoxdu. Onu hətta 2 həftəlik məvacibindən məhrum etsələr, artıq ortaya çox ciddi məbləğ (1 milyon avro) çıxacaq.

Səhvini etiraf etdi

Komandadan kənarlaşdırılması barədə şayiələr ildırım sürəti ilə yayılandan sonra Ronaldo sosial şəbəkədə paylaşdığı açıqlama ilə yanlış hərəkətə yol verdiyini dolayı yolla da olsa, etiraf etdi:

Kim nə dedi?

Təbii ki, bu hadisə İngiltərə futbol ictimaiyyətində böyük müzakirələrə səbəb oldu. Şərhçilərin, sabiq oyunçuların və mütəxəssislərin böyük əksəriyyəti Ronaldonu hərəkətinə görə qınadı. İngiltərə yığmasının sabiq üzvü Denni Milz bir çox insanın fikrindən keçəni dilə gətirdi: ''Ronaldonun hərəkəti, sadəcə, biabırçılıqdı. Oyun bitməmiş stadiondan ayrılmaq kluba, komanda yoldaşlarına, məşqçilər korpusuna və fanatlara hörmətsizlikdi. O, özünün klubdan üstün olduğunu düşünür. Bu əsl rüsvayçılıqdı''.

Premyer-liqa tarixinin ən yaxşı bombardiri Alan Şirer bu məsələdə Ten Haqın tərəfində olduğunu bildirdi:

Əfsanəvi Tyerri Anri diplomatik mövqe tutmağa çalışsa da, əslində dolayı yolla Ten Haqa dəstək verdi:

''Qızıl top''un beşqat qalibinin tərəfini tutanlar da var. Onlardan biri ''Yunayted''in sabiq üzvü Patris Evradı:

Britaniyanın ən populyar aparıcılarından olan Pirs Morqan isə Ten Haqın addımını Ronaldoya hörmətsizlik adlandırıb. Onun fikrincə, Ten Haq Ronaldonun ən azı ötən mövsüm komandanın ən yaxşı bombardiri olduğunu nəzərə almalıdı. Ronaldoya ən çox dəstək verən isə onun bacısı Elma Aveyro oldu:

Çıxış yolu varmı?

Bundan sonra nə olacaq? İndi hamını maraqlandıran əsas sual budu. ''Qardian'' nəşrinin yazdığına inansaq, Ten Haq qış transfer dönəmində Kriştianonun satışına icazə verə bilər. Hətta belə olacağı təqdirdə icraçı direktor Riçard Arnoldun da baş məşqçini dəstəkləyəcəyi gözlənilir. Ronaldo hər nə qədər illərə meydan oxumağa və bu yaşda dünyanın ən güclü çempionatında özünü göstərməyə çalışsa da, yaş yavaş-yavaş sözünü deməyə başlayır. 37 yaşdan sonra onun məhsuldarlığının aşağı düşməsi normaldı. Bu mövsüm premyer-liqada meydanda olduğu 340 dəqiqə ərzində onun hesabında yalnız 1 qol, 0 məhsuldar ötürmə var! Üstəlik pressinq, topsuz oyun kimi məqamlarda komandadakı digər forvardlar (Marsyal, Reşford) ondan daha faydalıdı. Ona görə də Ten Haqı Ronaldonu ehtiyatda saxlamaq qərarına görə qınamağa adamın dili gəlmir. Amma bir məsələyə görə Ten Haqı qınamağa dəyər. Axı yay hazırlıq dönəmində Ronaldonun toplanışa gec qoşulmasına və hələ o vaxtdan əsas heyətdə oynamaq istədiyinə işarə vurmasına baxmayaraq, məşqçi onun komandada qalmasının tərəfdarı olmuşdu. Çox maraqlıdı, Ronaldonu nəinki əsas heyətdə oynatmayan, bəzən hətta sonradan da meydana buraxmayan məşqçi onun komandada qalmasını niyə istəmişdi? Hər halda, 52 yaşlı mütəxəssis Ronaldonun onun sisteminə uyğun gəlmədiyini özü üçün müəyyənləşdirmişdi. Hərçənd Kriştianonun yaşını, məvacibini (həftəlik 500 min avro), tələblərini və ambisiyasını nəzərə alanda onun üçün yeni klub tapmaq çox çətin məsələdi. Hətta Ronaldonun başlıca pərəstişkarlarından olan Rio Ferdinand da artıq etiraf edir ki, onun bu mövsüm komandada qalması yanlış qərar oldu:

İndi vəziyyətdən üç çıxış yolu var. Birinci çıxış yolu Ronaldoya görə Ten Haqı qovmaqdı ki, hadisələrin belə axarı inandırıcı görünmür. İkinci çıxış yolu Ronaldonun yeni statusu və aqibəti ilə barışmasıdı. Son paylaşımını nəzərə alsaq, portuqaliyalı səhvini anlayıb və sadəcə, başını aşağı salaraq öz üzərində işləməyə hazırdı. Üçüncü və hər iki tərəfi qane edəcək kimi görünən variant Ronaldonun ''Yunayted''dən ayrılmasıdı. Amma bunun üçün Kriştiano ərəblərin milyonlarını qəbul edib onların ölkəsində oynamağa razılıq verməlidi. Çünki nə qədər acı səslənsə də, Avropada o artıq heç kimə lazım deyil…