“Azərbaycan futboluna az da olsa, töhfə verdiyim və onun bir parçası olduğum üçün qürur duyuram"
Bu gün Azərbaycanın əməkdar məşqçisi, “Şöhrət” ordeni laureatı, hazırda fəaliyyətini AFFA-nın Məşqçilər Komitəsinin üzvü kimi davam etdirən Ağasəlim Mircavadovun 75 yaşı tamam olur.
Football-plus.az xəbər verir ki, bu münasibətlə dünən AFFA-nın inzibati binasında baş katib Sərxan Hacıyev yubilyarla görüşüb, qurum rəhbərliyi adından onu təbrik edib, xoş arzularını çatdırıb. Mircavadov təbrikə və səmimi sözlərə görə AFFA rəhbərliyinə minnətdarlığını bildirib.
“Futbol+” də yubileyə biganə qalmadı. Ölkənin ən titullu mütəxəssilərindən biri olan Mircavadovla əlaqə saxlayaraq həm təbrikimizi çatdırdıq, həm də fikirlərini öyrəndik:
"Futbol həyatdı. Orda hər şey var: həyəcan, sevinc, uğur, xöşbəxtlik. Futbol həmçinin insanın tərbiyələnməsində rol oynayır. Odu ki, yenidən dünyaya gəlsəydim və peşə seçimi etsəydim, futbola üstünlük verərdim. Bizim dövrün uşaqları küçələrdən böyük futbola gələrdi. Futbolçu karyerama 1960-cı ildə “Spartak” cəmiyyətində başladım. Seçimlərdə qalib gəldikdən sonra futbol məktəbinə yazıldım. O vaxt hamımızın ən böyük arzusu "Neftçi"də oynamaq idi. Öncə əvəzedicilərdə çıxış etdim. O vaxtı 4 nəfər - mən, Əli Rəhmanov, Gülağa Quliyev və Arif Həmzəyev 60 manat əməkhaqqı müqabilində futbolçu karyerasına başladıq. 1967-də isə "Neftçi"nin əsas komandasında debüt etdim. İlk oyunum Odessa "Çernomorets"inə qarşı oldu. Amma bir il sonra dizimdən ciddi zədə aldım. O vaxtı indiki kimi peşəkar idman həkimləri yox idi. Zədəmi nə qədər əməliyyat, müalicə etdirsəm də, düzəlmədi. Hətta "Neftçi" rəhbərliyi 1970-ci ilə kimi zədəmin sağalması və yenidən yaşıl meydana qayıtmağım üçün çox çalışdı. Amma alınmadı və futbolçu karyeram qısa oldu. Daha sonra İdman İnstitutunu bitirdim. 1973-dən məşqçilik karyerama başladım, fərqli komandalarda çalışdım. 1982-ci ildə Moskva Ali Məşqçilər Məktəbini bitirdim. Valeri Lobanovski kimi dahilərdən dərs aldım. Ələkbər Məmmədov kimi məşhur həmyerlimizdən çox şey öyrəndim. Ələkbər müəllim həm məşqçim, həm də arxa-dayağım olub. O, mənə həmişə ağsaqqallıq edib. Çox şadam ki, istər SSRİ, istərsə də müstəqillik illərində "Neftçi"nin “sükanı arxasında” olmuşam, bu komanda ilə uğurlar qazanmışam. Ən ağır vaxtlarda Azərbaycan millisinin baş məşqçisi olmuşam. Azərbaycan futboluna az da olsa, töhfə verdiyim və onun bir parçası olduğum üçün qürur duyuram".
ABDULLA İSMAYILOĞLU
Digər xəbərlər
