Misli premyer-liqasında 11-ci tura start verilib.

"Qarabağ" "Turan Tovuz"u məğlub edib - 3:0. Görüşdən sonra ağdamlıların çalışdırıcısı Qurban Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- “MATCH TV”nin instaqram səhifəsində keçirilən sorğuda Rusiyada oynamış azərbaycanlı futbolçular arasında 1-ci seçildiz. Bundan xəbəriniz varmı?
- Gecə Ramil Şeydayev göndərmişdi mənə. Sağ olsunlar. Ola bilər, son zamanlar adım daha çox hallanır. Nazim Süleymanov, Vəli Qasımov Rusiya futbolunda uğurlu olublar. Mənim üçün maraqlı oldu. Səs verənlərə təşəkkür edirəm.

- “Qarabağ” sonuncu dəfə 8 ay əvvəl evdə “Marsel”ə uduzub. Bu məğlubiyyətsizlik seriyasının formulu nədi?
- Komandanı yaxşı hazırlamağa, motivasiya etməyə çalışırıq. Fiziki və psixoloji hazırlğı yaxşılaşdırmaq istəyirik. Qeyri-adi nəsə etdiyimizi deyə bilmərəm. Tutduğumuz yol var. İşimizi daha da yaxşılaşdırmağa çalışırıq. Uğurlu perioda keçmişik.

- Bədavi Hüseynovun durumu necədi?
- Sabah məlum olacaq. Ayağında ağrı var idi. Ona görə risk etmədik.

- “Nant”la ilk matçdan sonra bu komandanın oyununu izləmisiz?
- İzləmişəm. Bəzi məğlubiyyətləri bizi aldada bilər. “Frayburq”la matçı da, “Brest”lə görüşü də izlədim. Texniki səhvləri oldu. Bunlar hər komandada olur. Çempionat matçında sürətli, dinamik oynadılar. Daha yaxından təhlil edəcəyik.

- Ozobiç avrokuboklarda əsas heyətdə meydana çıxmır. Onun uzaq məsafədən zərbələrindən daha çox faydalanmaq olarmı?
- Az oynamayıb. Elə matçlar olur ki, bəzi oyunçuların sonradan meydana daxil olması daha əhəmiyyətli olur. Hər oyun uzaq məsafədən qol vurmur. Biz də təkcə bunu gözləməli deyilik. Əsas oyunçularımızdandı. Bütün futbolçular əsas heyətdə meydana çıxa bilər.

- “Nant”la səfər oyunu tarixi matçlardan biri olacaq. Heç-heçə də komandanı növbəti mərhələyə daşıyacaq. Ora heç-heçə üçün gedəcəksiz, yoxsa qələbə barədə düşünürsüz?
- Bu barədə düşünmürəm. Yaxşı nəticə əldə etmək istəyirik. İstənilən rəqibə qarşı ən azı onun səviyyəsində oynamağa çalışırıq. Nəticə üçün bacardıqlarımızı etmək istəyirik. Qələbə üçün oynayırıq. Alınmasa da, oyunumuzu qoruyub saxlamağa çalışırıq. Avropada sabitlik üçün yaxşı oyun göstərmək vacibdi. Fiziki və psixoloji hazır olmalıyıq. Ola bilər, heç-heçə bizi qane etsin. Qələbə daha yaxşı olar. Məğlubiyyət barədə düşünmürük.

- Mümkün təxribatlarla bağlı müraciət olacaq?
- O işlə klub rəhbərliyi məşğul olur. UEFA-nın da diqqətindədi. Son vaxtlar azalıb. Cüzi şeylərdi. Ümumiyyətlə, fikir vermirik.

- U-19-un sabiq baş məşqçisi Miloş Velebit deyib ki, Nəriman Axundzadə Azərbaycan futbolunun gələcəyidi və o, əsas komandada oynamalıdı. Ona az da olsa, şans verməyiniz və ya icarəyə göndərməyiniz mümkündü?
- Bizim futbolçumuzdu. Onun yaxşılığından başqa bir şey düşünmürük. Nərimanın gələcəyini yetərincə fikirləşirik. Vaxtı gələndə oynayacaq. Üzərində çox çalışmalıdı. Burda olduğu müddətdə yaxşılığa doğru çox irəliləyiş var. Tək oyunçu ilə ölkə futbolunun gələcəyini düşünmək olmaz. Nərimanlar çox olmalıdı. Hər oyunçu kimi o da şans qazanacaq.

- Şahruddin Məhəmmədəliyevin bu gün iştirak ərizəsində olmamasının səbəbi nə idi?
- Şahruddinin ayağında ağrı var idi. Dünən məşqdən sonra hiss etmişdi. Bu gün ona istirahət verdik. Qarşıda hələ vaxt var. Durumuna baxacağıq.

- Luka Quqeşaşvilinin inkişafı istədiyiniz kimi gedir?
- Luka çempionat oyunlarının çoxunda çıxış edib. Qapıçının inkişafı üçün oynaması lazımdı. Hər şey yaxşılığa doğru gedir. Üzərində çox çalışmalıdı. Böyük potensialı var. Böyük oyunlarda meydana çıxmaq üçün daha çox hazırlaşmalı, mübarizə aparmalıdı.

- 10 oyunda 10 qələbə gözləyirdiz? Çempionatın səviyyəsi nə göstərir?
- Dünya futbolunda olan hadisələrdəndi. Elə oyun olub ki, çətinlik çəkmişik, bəzisi daha asan keçib. İstənilən komanda istənilən komandanı məğlub edə bilər. bütün rəqiblərə ciddi yanaşırıq. Bu o demək deyil ki, bütün oyunlarda qalib gələcəyik. Belə vəziyyətdə bu istəyi saxlamaq asan deyil. Qalibiyyətlərlə üzərimizə daha çox yük düşür. Komandanın idman formasının yüksək səviyyədə olmasına çalışacağıq.