Karyerasını Belçika təmsilçisi ''Antverp''də davam etdirən Radja Nainqqolan məsuliyyətsizliyinin qurbanı olub.

Belə ki, təcrübəli yarımmüdafiəçi elektron siqaret çəkdiyinə görə qeyri-müəyyən müddətə əsas komandadan kənarlaşdırılıb. Hadisə ötən həftəsonu Belçika çempionatının 12-ci turunda ''Antverp''in ''Standard''ın qonağı olduğu matçda baş verib. Adı start heyətində olmayan Nainqqolan fasilədə meydana çıxıb.

Ehtiyatda oturarkən onun elektron siqaret çəkdiyi görüntülər qısa müddətdə sosial şəbəkələrdə yayılıb. Görüntülərin yayılmasının ardından rəhbərlik futbolçunu cəzalandırmaq qərarına gəlib. Nainqqolan hərəkətinin yanlış olduğunu etiraf edərək istənilən cəzanı qəbul etməyə hazır olduğunu deyib. Daha öncə ''Kalyari'', ''Roma'', ''İnter'' kimi klubların şərəfini qorumuş 34 yaşlı belçikalı ''Antverp''də 2-ci mövsümünü keçirir. Cari mövsüm o, 18 rəsmi oyuna çıxaraq 3 qol vurub.