Dünən Fransa çempionatının 10-cu turu çərçivəsində keçirilən oyunlar favoritlər üçün uğursuz alındı.

2-ci pillədəki ''Marsel'' tura sonuncu pillədə daxil olan ''Ayaçço''ya gözlənilmədən öz meydanında 1:2 hesabı ilə uduzdusa, PSJ səfərdə ortabab ''Reyms''in müqavimətini qıra bilmədi (0:0). Matçın ən diqqətçəkən hadisəsi 41-ci dəqiqəyə təsadüf etdi. Verrattinin rəqibə qarşı kobudluğu hakim tərəfindən qayda pozuntusu kimi qiymətləndirilincə, Ramos etiraz etməyə başladı və dərhal sarı vərəqə aldı. Onun işlətdiyi ifadə hakimin xoşuna gəlməyincə, 10 saniyə sonra Ramosa daha bir sarı vərəqə göstərildi və o, meydandan qovuldu. Bununla da 36 yaşlı müdafiəçi PSJ-də 2-ci, peşəkar Karyerasında 28-ci dəfə qırmızı vərəqə aldı. Bu 28 qırmızı vərəqədən yalnız 8-i ona birbaşa göstərilib. 20 halda o, ikinci sarı vərəqəni alaraq qovulub.

Beləliklə Ramos hərəyə 27 qırmızı vərəqəsi olan ''Sevilya''dakı sabiq komanda yoldaşı Pablo Alfaro ilə sabiq fransalı yarımmüdafiəçi Siril Rulu geridə qoyaraq futbol tarixində ən çox meydandan qovulan 2-ci futbolçuya çevrildi! Bu siyahıda lider isə Xerardo Bedoyadı. Əsasən Cənubi Amerika klublarında forma geyən və 2015-ci ildə futbolla vidalaşan sabiq kolumbiyalı yarımmüdafiəçi 20 illik karyerası ərzində 46 dəfə qırmızı vərəqə alıb!