Braziliya "Santa Kruz"unda çıxış edən Rafael Furtado karyerasını Azərbaycanda davam etdirə bilər.

"Football-plus.az" xəbər verir ki, məlumatı "Folhape" nəşri yayıb. 22 yaşlı futbolçu premyer-liqa təmsilçilərinin birindən təklif alıb. Lakin hansı klubun braziliyalı hücumçu ilə maraqlandığı açıqlanmayıb. Furtadonun "Santa Kruz"la müqaviləsinin müddəti noyabrda başa çatacaq. Forvard klubun sözləşməni yeniləməklə bağlı təklifini rədd edib.

Məsələ ilə bağlı redaksiyamıza informasiya daxil olub. Sən demə, forvardla “Kəpəz” yaxından maraqlanır. Gəncəlilər onu noyabrda heyətinə qatmaq niyyətindədi. Bununla bağlı tərəflər arasında danışıqlar davam edir.

Qeyd edək ki, 22 yaşlı hücumçu bu mövsüm Braziliyanın D seriyasında 16 qarşılaşmada meydana çıxıb və 2 qol vurub. Vətənində “Parana”, “Atletiko Mineyro”, “Konkerdiya”, Portuqaliyada “Koimbra”, ABŞ-da “Boston Siti”də çıxış edib. Keçirdiyi 50 rəsmi görüşdə 9 dəfə rəqib qapıçıları məyus edib.

İLKİN SULTANLI