“Kəpəz” - “Şamaxı” görüşündə VAR niyə olmayıb? - AÇIQLAMA
Misli premyer-liqasının 7-ci turu geridə qaldı. Üç gün ərzində bir-birinindən maraqlı 5 qarşılaşma izlədik.
4 görüşdə VAR-ın xidmətindən istifadə olunsa da, “Kəpəz” - “Şamaxı” matçı istisna təşkil etdi. Bunun səbəbi nədi? Axı eyni arenada 24 saat öncə keçirilən "Qəbələ" - "Sumqayıt" matçında bu texnologiyadan istifadə olunmuşdu. Rəsmi açıqlamada VAR avtomobilində texniki nasazlığın aşkarlanması səbəb kimi göstərilib. Həmin problem nə idi və həllini tapıbmı?
Suallarımızı AFFA Hakimlər Komitəsinin VAR layihəsinin əlaqələndiricisi Fəridə Lütfəliyevaya ünvanladıq. Qurum rəsmisi məsələ ilə bağlı bunları söylədi: “Məlumat üçün bildirmək istəyirəm ki, VAR EVS Proqram Təminatı vasitəsiylə hər oyundan 3-4 saat öncə mütləq şəkildə yoxlanılır və test edilir. Həmin görüşdə də bu prosedur yerinə yetirilmişdi. Lakin oyundan 45 dəqiqə əvvəl Mobil VAR nəqliyyat vasitəsində EVS Proqram Təminatı sıradan çıxmışdı. EVS şirkətinin qaynar xəttinə təcili zəng vuraraq məlumat verildi və kömək istənildi. Onların müşahidəsindən sonra texniki problem təsdiq olundu. Dünən sistem yenidən quraşdırılıb test edildi. Bundan əlavə, EVS şirkəti öz növbəsində problemi aradan qaldırmaq üçün müvafiq işlər görür. Əlavə olaraq məlumat vermək istəyirəm ki, texniki problemin mərkəzi sistemə aidiyyatı yoxdu. Yəni problem VAR mərkəzdə yox, VAR nəqliyyat vasitəsində baş verib”.
İLKİN SULTANLI
Digər xəbərlər
