5-ci turun mərkəzi oyunu "Zirə" - "Qəbələ" qarşılaşması idi.

Həmin matçı maraqlı edən məqamlardan biri də bir neçə gün öncə PFL-in mətbuat katibi təyin olunan Sənan Abdullayevin tribunada yer alması idi. Bunu nəzərə alıb, təcrübəli həmkarımızın fikrini öyrəndik: "Əvvəllər jurnalist, müxbir kimi ölkə çempionatının əksər oyunlarına gedirdim. Bu dəfə PFL rəsmisi kimi iştirak etdim. Rəsmi nümayəndə kimi iştirak etmək yaxşıdı, amma jurnalist kimi daha rahat olurdum. Çünki diqqətimi əsasən oyuna cəmləyirdim. İndi isə hər şeyə fikir verməli oluram. Əvvəllər mətbuat konfransında suallar verir, açıqlamalar alırdımsa, indi bu imkandan məhrumam. Bu da qəribə hiss yaradır. Görünür, buna uyğunlaşmaq üçün müəyyən zaman lazım olacaq. Əslində 5-ci turda yalnız "Zirə" - "Qəbələ" yox, həm də "Neftçi" - "Sumqayıt" oyununda iştirak etmişəm. Hər iki matçdan azarkeş kimi də zövq aldım. Hazırkı vəzifəmlə jurnalist həmkarlarıma əlimdən gələn köməyi etməyə çalışıram ki, idman mətbuatında irəliləyiş olsun, ölkə çempionatı daha yaxşı işıqlandırılsın".