''Real'' fanatları üçün yaxşı xəbər var.

"Football-plus.az" xəbər verir ki, artıq klubun iştirak ərizəsinə Avropa Birliyinə daxil olmayan ölkədən daha bir futbolçunun adını salmaq mümkün olacaq. Bu, Vinisius Juniorun İspaniya vətəndaşlığına keçməsi ilə mümkün oldu. Klubdan verilən rəsmi məlumatda qeyd olunub ki, braziliyalı ulduz konstitusiya qarşısında and içib və sentyabrın 2-də ona vətəndaşlıq verilib. Bilindiyi kimi ''sambaçı'' 2018-də ''Flamenqo''dan ''Real''a 45 milyon avro qarşılığında transfer olunub. İspaniya qanunlarına görə ölkədə minimum 2 il yaşayan braziliyalılar və argentinalılara vətəndaşlıq verilməsi mümkündü.

Vinisius sənədlərini hələ 2020-də verərək iki dəfə imtahandan keçmişdi. Amma ölkənin ədliyyə nazirliyi bu məsələni uzadırdı. Vinisiusdan başqa heyətdə Eder Militao və Rodriqo olduğundan ''Real'' AB-yə daxil olmayan ölkədən oyunçu ala bilmirdi. Limit bu cür statusda yalnız 3 oyunçu oynatmağa imkan verir. Məhz bu üzdən yayda Qabriel Jezuşun keçidi baş tutmamışdı. İspaniya mətbuatının yazdığına inansaq, Militao ilə Rodriqo da sənədlərini müvafiq orqanlara təqdim edib. Onların da bir neçə aya vətəndaşlıq alması mümkün olacaq.