Ötən sayımızda ''Beşiktaş''lı Sərdar Saatçının ''Braqa''ya keçmək üzrə olduğunu xəbər vermişdik.

Bu transfer artıq rəsmiləşib. ''Qartal'' öz yetirməsi olan gənc müdafiəçinin satışından 2,5 milyon avro qazanıb. Oyunçunun sonrakı satışından əldə olunacaq məbləğin 25 faizi də istanbullulara çatacaq. Sərdar ''Braqa'' ilə beşillik müqavilə imzalayıb. Maraqlıdı ki, portuqaliyalılar müqaviləyə 40 milyon avroluq təzminat maddəsi qoydurublar! ''Beşiktaş''ı tərk edən digər futbolçu isə Kənan Karamandı. 28 yaşlı oyunçu doğulduğu ölkəyə - Almaniyaya qayıtmağa üstünlük verib. O, ''Şalke-04'' ilə üçillik müqavilə imzalayıb. ''Ağ-qaralar'' bu keçiddən pul qazanmayıblar. Çünki Karamanla müqavilə qarşılıqlı şəkildə ləğv olunduqdan sonra futbolçu azad agent statusunda Helzenkirhen klubuna keçib. Qeyd edək ki, daha öncə ''Hoffenhaym'', ''Hannover-96'' və ''Fortuna''nın şərəfini qoruyan Kənan ''Beşiktaş''a ötən yay gəlmişdi. Onun Türkiyə macərasını tam bir fiasko adlandırmaq olar. Heç cür əsas heyət üzvünə çevrilə bilməyən və ümidləri doğrultmayan futbolçu ümumilikdə 35 rəsmi oyuna çıxaraq 2 qol, 2 məhsuldar ötürmə ilə yadda qaldı. Ötən turda ''Sivasspor''la qarşılaşmada sonradan meydana çıxdıqdan sonra fanatlar bu futbolçunu fitə basmışdı. Kənan yeni klubunda Frank Kramerlə yenidən birləşəcək. Onların yolu daha öncə ''Hoffenhaym''da kəsişmişdi.

''Beşiktaş''dan söz düşmüşkən, onu da bildirək ki, həyatının 10 ilini bu kluba həsr edən Oğuzhan Özyakupun yeni klubunun adına aydınlıq gəlib. ''Qartal''la müqavilə müddəti bitən və yeni təklif almadığı üçün ayrılaraq azad agentə çevrilən Oğuzhan əslində ''Antalyaspor''a keçməyə çox yaxın idi. Tərəflər anlaşma əldə etmiş və hətta futbolçu üçün Antalyaya bilet də alınmışdı. Amma Oğuzhanın son anda daha böyük məbləğ tələb etməsi üzündən transfer baş tutmadı. Təcrübəli futbolçu doğulduğu ölkəyə - Niderlanda yollanmağa üstünlük verdi. O, Burak Yılmazın da məsləhəti ilə ''Fortuna''ya keçməyə razılıq verib. Yəni Oğuzhan bundan sonra Yılmazla eyni klubda forma geyəcək. Onlar daha öncə ''Beşiktaş''da da birlikdə top qovublar. Transferin detalları barədə məlumat verilmir.

''Fortuna'' bu mövsüm erediviziyada 4 oyunun hamısında məğlub olub və hazırda sonuncu pillədədi. 2012-dən ''Beşiktaş''da olan 30 yaşlı yarımmüdafiəçi bu 10 ildə 3-ü çempionluq olmaqla 5 titul qazandı.