İntizam Komitəsinin iclası həftədə iki dəfə keçiriləcək - AÇIQLAMA
Birhəftəlik fasilədən sonra AFFA İntizam Komitəsinin iclası baş tutdu.
Toplantı ötən həftənin cümə günü keçirildi. Maraqlıdı ki, premyer-liqanın 2-ci turundan sonra qurumun üzvləri bir araya gəlməmişdi. Futbolçularla bağlı ciddi qərarlar verilməsə də, ən azı sarı vərəqələrə görə cəzalar olmalıydı. Lakin bu baş vermədi.
Görəsən, səbəb nədi? Bəlkə toplantı olub, amma AFFA və PFL qərarların açıqlanmasını sonraya saxlayıb? Bu suallara cavab tapmaq üçün İntizam Komitəsinin rəhbəri Erkin Hüseynovla əla saxladıq: “Bəli, doğru buyurursuz ki, iclas keçirilmədi. Ola bilməz ki, iclas keçirilsin, amma qərar açıqlanmasın. Müəyyən səbəblərdən baş tutmadı. Divizionda 15, premyer-liqada 10 klub var. Buna görə də bir az gecikmə oldu. İndi deyə bilərsiz ki, həmin həftə aşağı liqada oyunlar baş tutmamışdı. Lakin İntizam Komitəsinin Əsasnaməsinin hazırlanması və başqa məsələlərə görə gecikmə oldu. Qarşıdakı turlarda belə şeylər olmayacaq. Çalışacağıq ki, həftədə iki dəfə komitənin iclasını keçirək. Çünki çərşənbə axşamı və çərşənbə 1-ci divizionda oyunlar keçirilib. Cümə axşamı, saat 12.00-a kimi hakim-inspektorlar bütün qeydlərini komitənin katibliyinə təhvil verir. Burda da 15 klub var. Onların bir-bir cəzalarına baxmaq vaxt alır. Yəqin ki, qarşıdakı həftələrdə iki dəfə iclas keçirməyə başlayacağıq”.
Ötən həftə 1-ci diviziona start verildi. İlk tur olsa da, görüşlərdə maraqlı hadisələr yaşandı. Diqqətimizi çəkən ən qəribə məqam “təcili tibbi yardım”ın gecikməsi idi. Əslində ötən mövsüm də belə hallara tez-tez şahidlik edirdik. Bunun səbəbi nədi? Klublar nə üçün bu məsələyə ciddi yanaşmır? Bəlkə divizion təmsilçiləri cərimələnməyi “təcili tibbi yardım” maşını çağırmaqdan daha sərfəli sayırlar? Erkin Hüseynov məsələyə belə aydınlıq gətirdi: “Buna görə klubları qınamıram. “Təcili tibbi yardım”dan bizə müraciət oldu ki, pandemiya vaxtı çağırışlar çox olur. Buna görə də maşının stadionda 2 saat əvvəl gəlməsi ilə bağlı tələbi 60 dəqiqəyə endirdik. Komandalar matçın başlamısına 45 dəqiqə qalmış meydanda məşq edirlər. Bu zaman hansısa futbolçu zədələnə bilər. Ona görə də “təcili tibbi yardım” nümayəndəsinin oyuna 1 saat qalmışa qədər gəlməsini tələb edirik. Onlar da gecikirlər. Burda 5-10 dəqiqəlik vaxtdan söhbət gedir. Yenə deyirəm, klubların günahı olmur. Nümayəndə gecikir deyə, belə cərimələr tətbiq edirik”.
Misli premyer-liqasının 3-cü turunun “Zirə” – “Sumqayıt” oyununda hakimlərin işinə nümayişkəranə şəkildə müdaxilə etdiyinə görə Rəşad Sadıqova xəbərdarlıq olunub. Həmin hadisəyə, demək olar ki, bütün respublika şahidlik etdi. Çoxları gözləyirdi ki, gənc mütəxəssis İntizam Komitəsi tərəfindən cəzalanacaq. Lakin qurum adi xəbərdarlıqla kifayətlənildi. Bunun səbəbi nə idi? Erkin bəyi dinləyək: “Əvvəlcə onu qeyd edim ki, baş məşqçi kimisə təhqir etməyib. Heç Rəşad Sadıqova sarı vərəqə də göstərilməyib. Sadəcə, emosionallığını tənzimləməsi üçün xəbərdarlıq edildi. Onun belə reaksiya verməsi də başadüşüləndi. Lakin hakimin işinə müdaxilə etmək olmaz. Bu səbəbdən də ona İntizam Komitəsi tərəfindən xəbərdarlıq edildi”.
İLKİN SULTANLI
Digər xəbərlər
