Premyer-liqada 22-ci turun oyunları keçirilib.

"Sabah" doğma meydanda "Zirə"ni qəbul edib - 3:1. Qonaqların baş məşqçisi Rəşad Sadıqov oyundan sonra mətbuat konfransında iştirak edib. Çalışdırıcı görüş haqda bunları deyib:

"Maraqlı oyunun şahidi olduq. İlk hissə süni keçdi, lakin ikinci hissə daha sürətli futbolun şahidi olduq. Belə rəqibə qarşı istədiklərini həyata keçirmək çətindir. İki komandada ehtiyatlı başladı. Ani diqqətsizlikdən qol buraxdıq. Beləcə rəqibə üstünlük verdik. Qoldan sonra oyunu dəyişmək çətin oldu. İkinci hissəyə qolla başladıq, pis getmirdi. Belə səhvlərdən sonra bu rəqibə qarşı qələbə qazanmaq çətindi. Rəqibdə belə usta oyunçular varsa, qol buraxandan sonra hesabı dəyişmək çətin olur. Komandam xarakter göstərdi. Təhlükəli hücumlarımız oldu. Rəqib də yaxşı müdafiə olundu. Ümumi götürsək, komandamın çıxışından razıyam. Yaxşı oyunlardan birini keçirdik. Belə rəqiblərlə oyunda qələbə istəyirsənsə, hücumda və müdafiədə inamlı olmalısan".

- Davit Volkov uzun müddətdi qol vura bilmir. Nə üçün kölgədə qalıb? Bu, nədən irəli gəlir?
- Ürəksiz oynamır. O, çox yaxşı insandı. Həssasdı. Onunla dəfələrlə danışmışıq. Hiss olunur ki, təklifləri ona psixoloji təsir edib. Bu gün rəqibin bizdən yeganə üstünlüyü əlinə düşən fürsətlərdən istifadə etməsi idi.

- Xal fərqinin azalmasına görə komandada təzyiq yarana bilərmi?
- Bunu bilirdik. "Sabah"ın digər rəqiblərlə nisbətdə üstünlüyü var. İddiaçılardan olmaq istəyiriksə, sıx qrafikə, təzyiqə öyrəşməliyik. Qəti şəkildə həyəcanlanmamalıyıq. Qış fasiləsindən sonrakı çıxışımıza baxsaq, uğurlu gedirik. Çətin qrafikə düşmüşük. Bu oyunlarda xal itkiləri qaçılmaz idi. Daha çox xal qazana bilərdik. Hər şey sən ehtimal edən kimi olmur. Yolumuza davam edib, önümüzə baxmalıyıq. Qarşıda "Səbail"lə finala bərabər oyun olacaq.

- Hakimlərin sizə qarşı daha ciddi olduğunu düşünürsüz, ya özlərini toplayıblar?
- Buna şərh vermək çətindi. Keçmişdə mübahisəli epizodlar çoxdu. Hakimlikdən danışmağın xeyri olsa, danışaram. Olan olub. Önümüzə baxmalıyıq. Kifayət qədər təcrübəm var. Uğur qazanmaq istəyirsənsə, önünə baxmalısan.

- Təmkinin ilk hissədəki epizodunda "qaydalar Rəşada gələndə dəyişir" dediz. Bu haqda nə deyə bilərdiz?
- Əvvəlcə Təmkin itələdi, hakim cərimə verdi. Sonra bizim oyunçumuza eyni müdaxilə oldu, lakin hakim dayandırmadı oyunu. Buna görə demişdim. Bəzən elə epizodlar olur ki, özündən çıxırsan. Danışmağın nəsə mənası yoxdu, nəsə dəyişmir. Bəzən səhvlər də çoxalır, daha qəti şəkildə olur. Artıq diqqətimi yayındırmaq istəmirəm.